Daniiar Eleýsinov 8 maýsym kúni "Medison Skver Garden"-de óner kórsetýi tiis bolatyn. Alaida Olimpiada chempiony GGG jekpe-jeginiń anderkardynda shyqpaityn boldy. Golovkin men onyń promoýteri Tom Leffler Eleýsinovtiń menedjmentin kásipqoi emes dep aiyptady, dep jazady Sputnik agenttigi.
Daniiar Eleýsinovtiń kásipqoi ringtegi isterimen ainalysatyn amerikalyq menedjerlik kompaniianyń basshysy Ziia Aliev bul máseleni túsindirdi.
"Birinshiden, Tom Gennadiimen sóileskenimizdi jaqsy biledi. Gennadii de biledi. Men ózim sóilesken joqpyn. Sóilesken adamnyń atyn aitpai-aq qoiaiyn. Biraq onyń Golovkinmen sóileskenin anyq bilemin. Lefflerdiń ne degenin aita alar edim. Biraq olai istemeimin. Kerek bolsa, Tom Lefflerden kelgen elektrondyq hattar men sms habarlamalardy kórsete alamyn. Ol óz hattarynda Daniiardyń ornyna ózge boksshyny usynatynyn jazdy", dedi Ziia Aliev Sports.kz-ke bergen suqbatynda.
Onyń aitýynsha, bul tusta Daniiardyń komandasy emes, Tom Leffler kásibi maman emes ekenin kórsetken. Alaida Ziia Aliev ony aiyptamaitynyn aitty.
"Gennadii onyń boksshysy, árkim óziniń boksshysyn qorǵaidy. Al bizdi kásibi maman emes dep aiyptaý kúlkili. Mende Matchroom-nan kelgen hat bar, sizder ony kórdińizder. Redaktsiiaǵa usynǵan bolatynmyn. Biraq men onyń jariialanǵanyn qalamaimyn", - dedi ol.
Menedjerlik kompaniianyń basshysy Golovkinniń óz joly, Eleýsinovtiń óz joly bar ekenin atap ótti.
"Tom Golovkin óziniń jekpe-jek keshinde Daniiar Eleýsinovti kórgisi kelmeitinin aitty. Sms habarlamalardy kórsete alamyn. Tom buǵan daiyn bolsa, bizdiń dálelimiz bar. Men olardy kórsetsem, kim shyndyqty aityp otyrǵanyn bári birden túsinedi",- dedi Aliev.
