Foto: Instagram/porschetennis
Álemniń ekinshi raketkasy Elena Rybakina Germaniianyń Shtýtgart qalasynda ótken WTA 500 sanatyndaǵy bedeldi týrnirde top jaryp, jarystyń eki dúrkin chempiony atandy, dep habarlaidy Ult.kz.
Finalda qazaqstandyq tennisshi álemdik reitingte 12-orynda turǵan chehiialyq Karolina Mýhovamen kezdesti. Buǵan deiin qarsylastar úsh márte jolyǵyp, onyń ekeýinde Mýhova basym túsken edi.
Sheshýshi matchty Rybakina senimdi bastady — alǵashqy geimderde 3:0 esebimen alǵa shyqty. Alaida setke dop bergen sátte qatelikke boi aldyryp, esep teńesti — 5:5. Soǵan qaramastan, qazaqstandyq tennisshi taǵy bir breik jasap, alǵashqy partiiany 7:5 esebimen óz paidasyna aiaqtady.
Ekinshi sette Rybakina tolyq basymdyq tanytty. Qos breik jasap, 5:0 esebimen alǵa shyǵyp, match taǵdyryn is júzinde sheshti. Aqyrynda chempiondyq upaidy sátti oryndap, kezdesýdi 6:1 esebimen túiindedi.
1 saǵat 19 minýtqa sozylǵan oiynda Rybakina 3 eis jasap, 8 breik-pointtyń tórteýin tiimdi paidalandy. Al Mýhova 2 eis pen 1 breikke qol jetkizdi.
Osylaisha, Elena Rybakina Shtýtgarttaǵy týrnirde ekinshi ret chempion atanyp otyr. Aita keteiik, ol bul jarysta 2024 jyly da jeńiske jetken bolatyn. Ótken maýsymda qatyspaǵanyna qaramastan, qazaqstandyq sportshy Shtýtgarttaǵy jeńis seriiasyn 8 matchqa deiin jetkizdi.
