Foto: Ashyq derekkóz
Búgin Senat 2017 jylǵy 11 sáýirdegi EAEO Keden kodeksine ózgerister engizý týraly Hattamany ratifikatsiialaý týraly Zańdy maquldady. Atalǵan qujatqa 2023 jylǵy 25 jeltoqsanda Sankt-Peterbýrgte EAEO-ǵa múshe memleketter basshylary qol qoiǵan.
Senator Bekbol Orynbasarovtyń aitýynsha, qujattyń maqsaty – sońǵy jyldary aitarlyqtai ósim kórsetken syrtqy elektrondyq saýdany quqyqtyq retteý. Mysaly, 2024 jyly Qazaqstandaǵy elektrondyq saýda kólemi 3,2 trln teńgeni qurady.
Hattamada sheteldik internet-platformalardan halyqaralyq poshta arqyly jeke tulǵalarǵa jiberiletin taýarlardy erekshe sanat retinde bólip kórsetý qarastyrylǵan. Sonymen qatar, «elektrondyq saýda operatory» uǵymy engizilip otyr. Bul fýnktsiiany poshta operatorlary oryndaidy.
Basty jańalyq – elektrondyq saýda taýarlarynyń barlyǵy mindetti túrde kedendik deklaratsiiaǵa jatady. Buryn mundai taýarlar tek 200 eýro nemese 31 kg-nan asqan jaǵdaida ǵana deklaratsiialanatyn. Jańa tártip naqty statistika júrgizýge jáne kedendik tólemderdi tiimdi ákimshilendirýge múmkindik beredi. Deklaratsiiany operator da, alýshynyń ózi de tapsyra alady.
2021 jyldan beri Qazaqstanda bul baǵytta pilottyq joba júrgizilýde. Qazirgi tańda «Qazposhta» AQ pen «DHL International Kazakhstan» JShS operator retinde jumys istep jatyr. Aldaǵy ýaqytta basqa da logistikalyq kompaniialar qosyla alady.
Senatordyń aitýynsha, Hattamany qabyldaý:
Kedendik rásimderdi retke keltiredi;
Elektrondyq saýdadaǵy statistikany naqty etedi;
Barlyq naryq qatysýshylary úshin teń jaǵdai qalyptastyrady;
Tólemderdi basqarý tiimdiligin arttyrady.
