2020 jyldyń III toqsanynda Elektrondyq eńbek birjasynda (budan ári – EEB) bilikti qyzmetkerler úshin 176 myń bos jumys orny ornalastyrylǵan. Bul II toqsanǵa qaraǵanda 20,1 myńǵa jáne I toqsanǵa qaraǵanda 48,9 myńǵa kóp, dep habarlaidy "Ult aqparat" QR Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
«Eńbek resýrstaryn damytý ortalyǵy» AQ-da (budan ári – ERDO) atap ótkendei, aǵymdaǵy jyldyń shilde aiynda bos jumys oryndarynyń eń az sany ornalastyrylǵan – 44,4 myń, bul 5 shildeden 3 tamyzǵa deiin qosymsha karantindik sharalardy engizýge bailanysty bolýy múmkin. Biraq birtindep jeńildegennen keiin suranystyń ósý tendentsiiasy baiqaldy.
«Túiindemeni ornalastyrý boiynsha da osyndai dinamika bar. Máselen, 2020 jyldyń shildesine 32,3 myń boldy, biraq III toqsannyń qorytyndysy boiynsha jumys izdep júrgen 123,1 myń maman bar bolyp shyqty. Tek toqsanǵa ǵana emes, sonymen qatar sońǵy 12 ai boiynsha da qyrkúiek aiynda EEB-da eń kóp – 47,3 myń túiindeme ornalastyrylǵan», – dedi ERDO Boljaý departamentiniń direktory Dmitrii Shýmekov.
Bilikti qyzmetkerlerge eń kóp qajettilik Nur-Sultan (23,2 myń bos oryn) jáne Almaty (19,3 myń) qalalarynda, sondai-aq Qostanai (19,1 myń) jáne Qaraǵandy (17,6 myń) oblystarynda baiqaldy. Atyraý, Mańǵystaý, Qyzylorda, Túrkistan jáne Jambyl oblystarynda túiindemeler sany usynylǵan vakansiialar sanynan basym ekeni baiqalady. Atyraý oblysynda 100 bos orynǵa 220 túiindeme, Qyzylorda oblysynda – 180 túiindeme, Mańǵystaý oblysynda – 142 túiindeme keldi.
Aita ketý kerek, kásibi toptar boiynsha kásipqoi mamandar eń belsendileri bolyp tabylady, olardyń suranysy tutastai usynysqa sáikes. EEB-da ónerkásip, qurylys, kólik jáne basqa da uqsas salalar úshin 40 myńnan astam bos jumys orny ornalastyryldy. ERDO sarapshylarynyń pikirinshe, bul topqa suranys «Jumyspen qamtýdyń jol kartasy» baǵdarlamasyn júzege asyrýmen bailanysty. Bul rette jol jumysshysy mamandyǵy ótken toqsandaǵydai respýblika boiynsha tapshy mamandyqtar qatarynda tur. Munda 4,8 myń adam jetispeidi.
