Májilis depýtaty Elnur Beisenbaev Qyzyl kitaptyń halyqqa qoljetimdi bolmai otyrǵanyn, saldarynan sirek kezdesetin ósimdikter men aǵashtardyń joiylyp jatqanyn synǵa aldy, dep habarlaidy QazAqparat.
Májilis otyrysynda depýtat Ekologiia, geologiia jáne tabiǵi resýrstar ministri Serikqali Brekeshevke saýal qoidy.
«Búginde ósimdikterdiń sirek kezdesetin jáne joiylyp ketý qaýpi tóngen túrlerin zańsyz jinaý jáne joiý faktilerin jii kórip júrmiz. Mysaly 2020 jyly «Sýlpak» dúkeniniń aldynda Qyzyl kitapqa engen birneshe emen aǵashynyń kesilýi, Túrkistan oblysyndaǵy Greig qyzǵaldaq túrin zańsyz julý faktileri baiqaldy. Bul faktilerdiń eń birinshi sebebi – turǵyndardyń qandai ósimdikterdiń Qyzyl kitapqa kirgenin ajyrata almaýynda jatyr. Munda turǵyndardyń kinási nede? Ózińiz bilesiz, elimizde túsindirme jumysy joǵary deńgeide emes. Ekologiialyq ósimdikterdi qorǵaý mádenietin qalyptastyrýdy balalardan bastaýymyz qajet. Al biz áli kúnge deiin Qyzyl kitapty tsifrlandyra almai otyrmyz. Bizdiń Úkimetimiz tsifrlandy, biraq Qyzyl kitap áli kúnge deiin tsifrlanbaǵan jáne qoljetimsiz. Osy máseleni ministrlik jaqyn arada qalai sheshýdi josparlap otyr? Jalpy túsindirme jumystaryn jaqsy deńgeige qashan jetkizemiz?», - dedi E. Beisenbaev.
Óz jaýabynda Ekologiia ministri mundai jaǵdailardyń rasymen de bolǵanyn, osyǵan orai, ministrlik halyq arasynda ekologiialyq aǵartý, sirek kezdesetin jáne quryp ketý qaýpi tóngen ósimdikterdi qorǵaýdy nasihattaý boiynsha keń aýqymdy jumys júrgizip jatqanyn aitty.
«2019-2021 jyldary osyndai 23 oqiǵa oryn alyp, jalpy shyǵyn kólemi 13 mln teńgeni qurady. 2019 jyly – 13, 2020 jyly – 7, al byltyr – 3 qylmystyq is qozǵaldy. Munda tómendeý dinamikasy baiqalady. Ákimshilik jáne qylmystyq quqyqbuzýshylyqtar týraly kodeksterge ekologiialyq zań buzǵany úshin ákimshilik jáne qylmystyq jaýapkershilikti kúsheitýdi kózdeitin túzetýler engizetin zań jobalary ázirlendi. Sonyń biri búgin Parlamentte qaralyp otyr», - dedi Serikqali Brekeshev.
Aita keteiik, Májilis depýtattary «Ósimdikter dúniesi týraly» zań jobasyn birinshi oqylymda maquldady.
