Búgin elimizde Ulttyq biryńǵai testileý bastaldy. UBT nátijelerimen memlekettik bilim berý grantyn taǵaiyndaý konkýrsyna qatysýǵa bolady. Testileý tolyǵymen elektrondy formatta júrgizilip jatyr, dep habarlaidy "Ult aqparat" BǴM baspasóz qyzmetine silteme jasap.
Ministrliktiń habarlaýynsha, UBT-ǵa qatysý úshin 120 myńnan astam adam tirkelgen, onyń ishinde birinshi kúni testileýdi 8 myńnan astam túlek tapsyryp jatyr.
Talapkerler UBT-ny 2 ret tapsyra alady, olar testileýdiń kúni men ýaqytyn ózi tańdaidy. Memlekettik bilim berý grantyn taǵaiyndaý konkýrsyna qatysý úshin oqýǵa túsýshi eń joǵary upaiy bar sertifikatyn usyna alady. Bul úmitkerlerdiń grantty jeńip alý múmkindigin aitarlyqtai arttyra túspek.
«2019 jyly Memleket basshysy Qasym-Jomart Kemeluly ózi qatysqan Tamyz keńesinde tapsyrma bergen bolatyn. Ulttyq biryńǵai testileýdi ózgertý, ony balalarǵa yńǵaily ári barynsha ashyq ótkizý boiynsha maqsat qoiylǵan bolatyn. Biz búgin osy maqsatqa jetip, UBT-ny jańa formatta ótkizip jatyrmyz. Eń bastysy, qoǵamda aitylyp júrgen syn-pikirlerdi eskerip, jańa tehnologiialardy qoldana otyryp, úlken ózgerister jasap jatyrmyz», – dedi Bilim jáne ǵylym ministri Ashat Aimaǵambetov.
Elektrondy format ashyqtyqty barynsha qamtamasyz etýge, qatysýshylarǵa qolaily jaǵdai jasaýǵa kómektesedi. Bul formattyń taǵy bir artyqshylyǵy – UBT nátijelerin testileý aiaqtalǵannan keiin birden bilýge bolady. Jinalǵan upai sany ekranǵa shyǵarylady. Sondai-aq UBT qatysýshysy qate jaýap bergen suraqtardy kóredi. UBT qorytyndylarymen kelispegen jaǵdaida talapker kelesi kúndi kútpei-aq birden apelliatsiiaǵa ótinish bere alady.
«Endi UBT elektrondyq formatta ótip jatyr. Buǵan deiin balalar qaǵaz júzinde test kitapshalaryn alyp, odan keiin tiisti paraqtarda jaýaptardy boiaý arqyly tapsyratyn. Test kitapshalaryn basyp shyǵartynbyz, ol kitapshalar jetkenge deiin ártúrli táýekelder de bolatyn. Ekinshiden, 2 myńǵa jýyq kezekshi muǵalim jazda bir óńirden ekinshi óńirge jiberiletin, oǵan úlken qarajat bólinetin jáne bul rette de ártúrli táýekelder bolatyn. Úshinshiden – bul ashyqtyq. Qazir kórip otyrsyzdar, ár ata-ana balasynyń qalai tapsyryp jatqanyn onlain baqylai alady. Ár balada bir kompiýter, bir beinekamera bar, proktoring júiesi arqyly baqylaý júrgizilip jatyr. Sondyqtan kóshirip alý degen siiaqty akademiialyq adaldyq qaǵidalaryn buzýǵa eshqandai múmkindik joq. Taǵy da bir óte mańyzdy másele, buryn balalar testti bir-aq ret tapsyryp, sonyń nátijesi boiynsha grantqa konkýrsqa qatysa alatyn. Qazir balalarda eki múmkindik bar. Bir ret tapsyryp kóredi, eger alǵan nátijesi unamasa, ekinshi márte qaita tapsyryp, sol sertifikatpen konkýrsqa qatysa alady. Bul da – úlken jańalyq», – dedi ministr Ashat Aimaǵambetov.
Jalpy UBT pánderiniń sany ózgerissiz qaldy – úsh mindetti pán jáne ekeýi tańdaý boiynsha. Test tapsyrmalarynyń sany – 120, onyń ishinde Qazaqstan tarihy boiynsha – 15, matematikalyq saýattylyq – 15, oqý saýattylyǵy – 20 jáne eki beiindik pán boiynsha 35 tapsyrmadan. Testileýge jalpy 4 saǵat (240 minýt) beriledi. UBT-ǵa qatysýshylardyń maksimaldy 140 ball jinaý múmkindigi bar.
