QR Premer-Ministri Baqytjan Saǵyntaev Úkimettiń búgingi otyrysynda bastaýysh synyp oqýshylarynyń aýyr sómkesine qatysty máseleni kóterdi, dep habarlaidy QazAqparat tilshisi.
«Ata-analar tarapynan kóptegen suraqtar kelip túsýde, oqytýdyń jańa mazmuny jóninde, oqýshylardy baǵalaý máselesi, elektrondy jýrnaldar, bastaýysh synyp balalarynyń sómkesi aýyrlap ketti. Olarǵa qandai jaýap bere alamyz?», - dep saýal qoidy Premer-Ministr QR Bilim jáne ǵylym ministri Erlan Saǵadievke.
Óz kezeginde bilim jáne ǵylym ministri jańartylǵan mazmun boiynsha túsindirý jumystary jalǵasyp jatqanyn, balalardyń 70 protsenti jańa baǵdarlama boiysha oqitynyn atap ótti.
«Jańartylǵan mazmun máselesi sheshilgen, ata-analar men balalar túsinip jatyr, taǵy bir jyl berse, barlyq túsinispeýshilikter aiqyndalady. Sómke máselesin sheshýdiń joly - mektep ishinde kitap qaldyratyn arnaiy shkaftar ázirleý, ony synypta nemese dálizde salýǵa bolady. Elektrondy oqýlyqtar qazir de bar, ony jii paidalanady. Jańartylǵan mazmunǵa kóshken synyptarǵa elektrondy oqýlyqtar 100 protsent engizilgen. Iaǵni, qazirgi ýaqytta balalardyń 70 protsentine elktrondy oqýlyqtar qoljetimdi. Bizdiń jospar boiynsha, aldaǵy eki jylda oqýlyqtar 100 protsent elektrondy túrde shyǵady», - dedi E. Saǵadiev.
Sonymen birge, biyl alǵash ret qaǵaz oqýlyqtar normasy, onyń qandai qaǵazdan jasalatyny, pishimi men salmaǵy bir normaǵa keltirilip, tiisti qujattar bekitilgen.
«Sómkelerdiń salmaǵy boiynsha jańa standarttar jasadyq dedik, ony kim shyǵaryp jatyr? Elektrondy oqýlyqtar da barlyq pánnen joq. Bir jaǵynan jasadyq dedik, shyn máninde onyń bireýi de jumys istemeidi. Nátijesinde sol baiaǵy salmaǵy aýyr kitap, bastaýyshta oqityn kishkentai balaǵa úlken salmaq. Aldymen sheship alyp, sodan keiin jasamaimyz ba? Qaǵazdaryn jónge keltirip, sodan keiin jańa standartqa kóshpeimiz be?», - dep qosymsha suraq qoidy Premer-Ministr Saǵyntaev.
«Qaǵaz oqýlyqtardy 50-60 jyl boiy balalar tasyp júrdi. Biz de tasyǵanbyz. Biyl alǵash ret standartty engizip otyrmyz, oqýlyqtardyń qai qaǵazdan basylatynyn, salmaǵy men formatyn bekittik. Árine, ol tek biyl shyǵatyn oqýlyqtarǵa engizilgen, endi 5-6 jylda barlyq oqýlyqtardy qamtidy. Elektrondy oqýlyqtar 70 protsent jumys istep jatyr, endi jańartylǵan mazmunǵa kóshetin synyptardyń oqýlyqtaryn elektrondy túrde mindetti túrde shyǵaratyn bolamyz», - dep jaýap berdi Saǵadiev.
