Qyrǵyzstan prezidentiniń baspasóz hatshysy Erbol Sýltanbaev Ortalyq Aziia elderinde bolǵan elektr energiiasynyń óshýine bailanysty apat sebebi anyqtalyp jatqanyn málim etti. Bul týraly QazAqparat «Kabar» agenttigine silteme jasap habarlaidy.
«Qazirgi ýaqytta Qyrǵyzstannyń barlyq óńirinde elektr energiiasyna kezeń-kezeńimen qosý júrip jatyr. Taiaý ýaqytta eldiń energojúiesi qalpyna keltiriledi», - dedi ol.
«Kabar» agenttigine atalmysh eldiń Ulttyq energiia holdinginen málim etkendei, búgin kúndiz Qazaqstan, Qyrǵyzstan jáne Ózbekstan elderinde jaryqtyń kenetten óshýine Ortalyq Aziia Birlesken energojelisindegi elderdiń birinde bolǵan apat sebep.
Al Ózbekstannyń Energetika ministrliginiń aqparatyna sáikes, Tashkent JES pen Syrdariia JES Ortalyq Aziia Biriktirilgen elektr jelisine qosylǵanyna bailanysty apat saldarynan eki stansa jumysy da avtomatty túrde toqtap qalǵan.
«Búgin saǵat 10:57-de Ortalyq Aziia Biriktirilgen elektr jelisindegi iri apat saldarynan Almaty, Shymkent, Taraz, Túrkistan (oblysy) jáne Qazaqstanǵa jaqyn mańdaǵy aýdandarda elektr energiiasy óshti.
Apat saldarynan Qyrǵyzstannyń energojúiesinde, sonyń ishinde Bishkek, Osh jáne Jalal-Abadta irkilis baiqaldy.
Tashkent JES pen Syrdariia JES Ortalyq Aziia Biriktirilgen elektr jelisine qosylǵanyna bailanysty apat saldarynan eki stansa jumysy da avtomatty túrde toqtap qaldy.
Bul, óz kezeginde Talimarjan jáne Týraqorǵan JES-ta jumystyń toqtalýyna ákelip soqtyrdy.
Sonyń saldarynan Ózbekstannyń Ferǵana jáne Tashkent oblystarynda, Ferǵana ańǵary, Syrdariia, Jizaq, Samarqan, Buhara, Qarqardariia oblystary elektr energiiasyz qaldy.
Qazirgi kezde kórshiles memlekettik jelilerden ajyraý protsesi júrgizilip, árbir JES-tyń jeke qosylýy, jelilerdi brtindep qosý jumystary jurgizilýde.
Apat týraly qosymsha aqparat erteń usynylatyn bolady», - delingen Ózbekstan Respýblikasy Energetika ministrliginiń habarlamasynda.
