Básekelestikti qorǵaý jáne damytý agenttigi tóraǵasynyń birinshi orynbasary Rýstam Ahmetov elektr energiiasynyń kóterme jáne bólshek saýda naryqtaryna qatysty túsinik berdi, dep habarlaidy QazAqparat.
«Sońǵy úsh jylda elektr energiiasyn óndirý 7% ósti. Ósimniń oń serpini jańa qýattardy qurmai jumys istep turǵan qýattardy jańǵyrtý esebinen qalyptasty. Bul rette, óndiris kóleminiń ulǵaiýy memleket qatysatyn stantsiialardy jańǵyrtýdan keiin oryn aldy jáne tiisinshe, negizgi investor memleket bolyp otyr», - dedi R. Ahmetov Ortalyq kommýnikatsiialar qyzmetinde.
Onyń paiymynshsha, baǵany retteý jaǵdaiynda naryqtyń damýy, jańa dástúrli stantsiialardyń paida bolýy, jeke investitsiialardyń aǵyny bolmaidy.
«Bul naryqty qaita retteý, naryqtyq baǵa belgileýge kezeń-kezeńimen kóshý jáne kóterme ári bólshek býyndy monopoliiasyzdandyrý jaǵdaiynda jeke investitsiialardy tartýǵa baǵyttalǵan elektr energiiasyn óndirý naryǵyn damytýdyń uzaq merzimdi strategiiasyn ázirleý men iske asyrýdy talap etedi. 90-jyldary bastalǵan naryqty yryqtandyrý aiaqtalǵan joq. Elektr energiiasyn óndirý naryǵy joǵary shoǵyrlanǵan kúiinde qalyp otyr. Naryqtyń negizgi 4 qatysýshysynyń úlesi – «Samuryq – Energo» AQ, «OAEK» AQ, «ERG» AO, «QKJ» JShS – 69% quraidy jáne olar tik integratsiia formatynda jumys isteidi», - dedi agenttik ókili.
Onyń sózine qaraǵanda, stantsiia resýrstaryna jáne elektr energiiasyn berý qyzmetterine qoljetimdilikti shektei otyryp, atalǵan toptar óńirlik bólshek saýda naryqtaryn tolyǵymen japty. Olar bir-birimen básekelespeidi. Sonymen qatar, olar tutynýshylarǵa shyǵyn keltire otyryp, óz stantsiialarynan qymbat energiia alady. Naryqtyń 99%-y tikelei sharttar boiynsha jumys isteidi.
