Foto: Altynbek Qartabai
Dziýdodan Parij olimpiadasynyń jeńimpazy Eldos Smetovke Jambyl oblysynyń ákimi Erbol Qarashókeev jańa Lexus 600 kóligi men Taraz qalasynan 5 bólmeli páter kiltin tabystady, dep habarlaidy "Ult aqparat" Kazinform aqparat agenttigine silteme jasap.
Eldostyń jattyqtyrýshysy Ǵalymjan Jylgeldievke de Hyundai Santa Fe avtokóligi men 2 bólmeli páter kiltin syilandy. Baǵaly kólikter men páterler óńirdegi kásipkerlerdiń demeýshiligimen Olimpiada chempiony men bapkerine arnaiy alynǵan.
Foto: Altynbek Qartabai
«Jaqynda ǵana Parijde ótip jatqan 33-shi jazǵy Olimpiada oiyndarynda elimiz tarihi jeńiske qol jetkizdi. Bul jeńis jambyldyqtardyń ǵana emes, barsha qazaqstandyqtyń mártebesin asqaqtatty. El balasy Eldos Smetov dziýdo sporty boiynsha Táýelsiz Qazaqstannyń tarihynda tuńǵysh Olimpiada chempiony atanyp otyr. Danqty sportshy Jaqsylyq Úshkempirov aǵamyzdan keiin birde-bir qazaq balasy bul biikti baǵyndyrǵan emes. Araǵa 44 jyl salyp Eldos Smetov qazaqtyń osy arman-maqsatyna qol jetkizdi. Osy sátte, Áýlie ata óńiri – chempiondar ólkesi, myqty bapkerler ordasy degim keledi. Sondai-aq, Qasietti Jambyl jeri – er Eldostyń jeńisinen keiin jaýyryny jer iiskemegen palýandardyń astanasy desek qatelespeimiz. Qazaq sportynyń, Jambyl sportynyń dańqy arta bersin! Elimizdiń kók bairaǵy biikten jelbirei bersin!» - dedi stadionda sóilegen sózinde oblys ákimi.
Foto: Altynbek Qartabai
Saltanatty keshte «Alashuly» toby, ADAM, Turar, Kalifarniya jáne Ernar Aidar syndy estrada juldyzdary óner kórsetti.
Buǵan deiin Olimpiadanyń kúmis júldegeri Ǵusman Qyrǵyzbaevqa kólik tartý etilgeni týraly jazǵanbyz.
