«Nur Otan» partiiasynyń elordadaǵy qoǵamdyq qabyldaý bóliminde QR Ishki ister ministri Erlan Turǵymbaev azamattardy jeke máseleleri boiynsha qabyldady, dep habarlaidy QazAqparat tilshisi.
Óziniń máselesin QR Ishki ister ministrine jetkizý úshin turǵyndar elimizdiń túkpir-túkpirinen arnaiy kelipti. Áýeli Erlan Turǵymbaev óńirlermen onlain-bailanysqa shyǵyp, azamattardyń shaǵymdary men saýaldaryn tyńdady. Halyq tarapynan qoiylǵan suraqtardyń jalpy sipaty týraly QR Ishki ister ministrliginiń resmi ókili Nurdildá Oraz aityp berdi.
«Búgin «Nur Otan» partiiasynyń alańynda ministr qarapaiym azamattardy óziniń máselelerimen qabyldap jatyr. Qazirdiń ózinde 50-ge jýyq azamat túrli aimaqtardan ózderiniń saýaldaryn tikelei qoiýǵa jazylǵan. Buǵan tehnikalyq múmkindik bar. Suraqtardyń sipaty árkelki. Máselen, Pavloldar, Almaty oblystarynan qylmystyq isterdi zańsyz qysqartýǵa bailanysty suraq qoiyldy. Tergeýshilerdiń áreketterine kóńili tolmaityn adamdar da habarlasyp jatyr. Osy jáne ózge de máseleler boiynsha suraqtar qoiylýda. Dál osy jerde QR Ishki ister ministri osydan birneshe ai buryn qarapaiym turǵyndardy qabyldaǵan bolatyn. Ol kezde 40-qa jýyq aryz qaraldy. Onyń 80 paiyzy ministrdiń qatań baqylaýynda bolyp, kóptegen azamattar saýaldaryna sheshim tapqan bolatyn. Búgin qoiylǵan suraqtardyń bári solai qarastyrylady», - deidi Nurdildá Oraz.
Ministrlik ókili qabyldaýǵa jazylǵan adamdardyń keibiri Ishki ister ministrliginiń quzyretine jatpaityn saýaldar qoiyp jatqanyn da atady.
«Keibir azamattardyń prokýratýra, sot salasyna qatysty suraqtardy qoiǵanyn kórdińizder. Olardy sipatyna qarai sotqa nemese prokýratýraǵa baǵyttap jatyrmyz. Ishki ister ministrligi óziniń quzyreti boiynsha jaýap beredi. Degenmen, búgin qoiylǵan suraqtardyń barlyǵy qatań tekserilip, ministrlik qurylymyndaǵy jergilikti organ basshysynyń, tipti bolmasa ministrlik basshylyǵynyń nazaryna alynyp, sheshimin tabatyn bolady», - deidi ol.
Resmi ókil ishki ister salasyna qatysty problemasy bar adamdar «Nur Otan» partiiasynyń qabyldaý uiymdastyrýyn kútpei-aq, óz betimen aryzdanýǵa bolatynyn aitady.
«Azamattardy qabyldaý protsesi tek «Nur Otan» alańynda ǵana júrgizilmeitinin aitqym keledi. Ministrdiń óziniń qabyldaýy bar. Ol jylyna 4-5 ret, saýaldar kóp bolǵan jaǵdaida odan da jii ótkiziledi. Ministrlik basshysynyń bes baǵyt boiynsha orynbasarlary, komitet jáne departament basshylary bar. Olar dál osyndai qabyldaýlar ótkizedi. Ár óńirdegi politsiia departamentiniń basshylary da jergilikti halyqty jeke máseleleri boiynsha qabyldaidy. Árbir qabyldaý protsesi ministrlik saitynda kórsetilgen. Kez kelgen qandai da bir suraǵy bolsa, ol tergeýge qatysty ma, bolmasa kriminaldyq sala boiynsha ma, bolmasa qylmystyq atqarý júiesine shaǵymy bolsa, ózi qýdalaýǵa ushyrasa, qyzmetkerlerdiń jumysyna kóńili tolmasa ishki ister ministrliginiń saitynda kórsetilgen keste boiynsha qabyldaýǵa jazylyp, óz máselelerin sheshe alady», - dep tolyqtyrdy ol.
