Foto: Abai oblysy ákimdiginen
Abai oblysyndaǵy Besqaraǵai aýdanyna qarasty Qoianbai aýylynyń mańyndaǵy órtti sóndirý jumystary júrip jatyr. Qazir órtti sóndirýge barlyǵy 353 adam, 130-ǵa jýyq tehnika jáne 1 tikushaq tartyldy, dep habarlaidy Abai oblysy ákimdiginiń baspasóz qyzmeti.
Besqaraǵaidaǵy órt 4 sáýirde tutanǵan bolatyn. Jeldiń ekpinimen órt "Semei ormany" tabiǵi rezervatynyń Morozov filialy aýmaǵyna taralǵan.
"Oqiǵa ornyna dereý órt sóndirý bólimderi, arnaiy tehnika men orman sharýashylyǵy qyzmetkerleri jumyldyryldy. Órt sóndirýge Abai, Shyǵys Qazaqstan jáne Pavlodar oblystarynyń Tótenshe jaǵdailar departamentteri, "Semei ormany" men "Ertis ormany" mekemeleriniń qyzmetkerleri jáne jergilikti atqarýshy organdar atsalysyp jatyr", – deidi Abai oblysy ákimdiginiń baspasóz qyzmeti.
Qazirgi ýaqytta órttiń taralýy toqtaǵan, jaǵdai turaqtanyp keledi. Mamandardyń aitýynsha, jańbyrly aýa raiy órtti sóndirýge qolaily jaǵdai týǵyzǵan.
"Qazirgi ýaqytta eń bastysy, eldi mekenderge qaýip tónip turǵan joq. Aimaqtaǵy ahýal tolyq qadaǵalanyp otyr", – delingen habarlamada.
