Aqtóbe oblysynyń aýyldyq eldi mekenderin taza sýmen jáne gazben qamtamasyz etý jumystary qarqyndy júrip jatyr. Bul týraly búgin Ortalyq kommýnikatsiialar qyzmetindegi baspasóz máslihatynda Aqtóbe oblysynyń ákimi Ońdasyn Orazalin aitty, dep habarlaidy "Ult aqparat".
«Memleket basshysynyń tapsyrmasy aiasynda halyqty taza sýmen qamtamasyz etý máselesin tolyq sheshýge jaqyndap qaldyq. Biyl bul kórsetkish 95 paiyzǵa jetti. Osy jyly halyqty taza aýyz sýmen qamtamasyz etýge 2,7 mlrd teńge bólinse, kelesi jyly qarjylandyrý kólemi 2,5 ese artyp otyr. Bul - 22 eldi mekenge aýyz sý jetkizetin 27 jobaǵa 6,8 mlrd teńge bólinedi degen sóz. Aldaǵy 1-2 jyldyń ishinde aýyldardy tolyqtai taza sýmen qamtamasyz etýge múmkinshiligimiz bar», - dedi oblys ákimi.
Óńir basshysynyń dereginshe, biyl oblys halqynyń 29,4 paiyzy gazben qamtamasyz etilgen. Bul respýblika boiynsha joǵary kórsetkish deýge bolady. Degenmen oblysta shalǵaidaǵy eldi mekenderge gaz ótkizý máselesi áli de ózekti.
«Sebebi olar shalǵaida ornalasqannan keiin gazdandyrý úlken qarajatty qajet etedi. Dei turǵanmen, bolashaǵy bar, áleýeti mol aýyldarǵa gaz jetkizýmen ainalysyp jatyrmyz. Biyl Úkimettiń qoldaýymen 17 aýyldy gazben jabdyqtaý úshin qosymsha 2,5 mlrd teńge bólindi. Kelesi jyly bul jumys jalǵasyn tabady. 20 eldi mekenge arnalǵan 24 jobaǵa 1,5 mlrd teńge oblystyq biýdjetten bólinedi. Osylaisha birtindep bul máseleni de sheshemiz»,- dedi O.Orazalin.
