Elden shettetilgen eki sheteldik aty-jónin ózgertip Atyraýǵa qaita kelgen, dep habarlaidy QazAqparat.
Oblystyq politsiia departamenti baspasóz qyzmetiniń málimetinshe, «Migrant» jedel-profilaktikalyq is-sharasy men «Izdestirý» aktsiiasyn ótip jatyr.
«Atalǵan is-sharalar kezinde Atyraý qalalyq politsiia basqarmasy kriminaldyq politsiia bólimi men kóshi-qon qyzmeti bóliminiń qyzmetkerleri qoǵamdyq orynda mas kúide júrgeni úshin Qazaqstan Respýblikasynyń aýmaǵynan 5 jylǵa shettetilgen sheteldikti ustady. Ózbekstan Respýblikasynyń 33 jastaǵy azamaty óz eline baryp, jeke basyn rastaityn qujatyndaǵy aqparattardy ózgertip, Qazaqstanǵa keri kelgeni belgili boldy. Al, Ázerbaijan Respýblikasynyń 53 jastaǵy azamaty da dál osyndai áreketke barǵan. Ol 2018 jyly sot sheshimimen qylmystyq jaýapkershilikke tartylyp, elimizdiń aýmaǵynan shyǵarylǵan. Alaida, eline barǵan sheteldik tólqujatyn ózgertip, biylǵy aqpanda Atyraýǵa qaita kelgen», - deidi kóshi-qon qyzmetiniń bastyǵy Qadyrbek Ábishov.
Onyń aitýynsha, elge kirý zańnamasyn buzǵan sheteldikter kinásin moiyndaǵan. Qazir eki sheteldik sot sheshimimen ákimshilik qamaqqa alyndy. Is-qujattar jinaqtalyp, el aýmaǵynan shyǵarý maqsatynda zańdy sheshim qabyldaý úshin sotqa joldandy.
