Foto: QR SIM
Ótken demalys kúnderi óńirlerde 92 aýyl sharýashylyǵy jármeńkesi uiymdastyryldy, dep habarlaidy Ult.kz.
Oǵan myńnan astam fermer men taýar jetkizýshi qatysty. Jármeńkelerdiń negizgi maqsaty – siyr etin naryqtaǵy baǵadan tómendetilgen baǵada satý, sondai-aq kókónis, sút ónimderi jáne ózge de maýsymdyq aýyl sharýashylyǵy ónimderiniń assortimentin keńeitý.
Siyr eti Qaraǵandy oblysynda eń kóp satylǵan. 52 tonnadan astam et ótkizildi. Astana men Almatyda da kórsetkish jaqsy. Elordada 45,5 tonna, Almatyda 35 tonna siyr eti satyldy. Astanada ettiń baǵasy kilogramyna 3200-3500 teńge aralyǵynda bolsa, Almatyda ortasha baǵa 3150 teńgeni qurady, bul naryqtaǵy baǵadan 5%-ǵa tómen. Eki qaladaǵy jármeńkelerge suranys joǵary bolyp, Astanada shamamen 40 myń, Almatyda 30 myńnan astam turǵyn keldi.
Aqtóbe oblysynda 25 tonna siyr eti turaqty 2700 teńgeden satyldy, bul naryqtaǵy ortasha kórsetkishten 8%-ǵa tómen. Qostanai oblysynda 11 tonnaǵa jýyq et ótkizilip, kilogramyna ortasha baǵa 2925 teńgeni qurady. Shymkentte 6,2 tonna siyr eti satylyp, ortasha baǵasy 3400 teńge boldy.
Birqatar óńirlerde siyr etiniń baǵasy naryqtan edáýir tómen deńgeide belgilendi. Máselen, Pavlodar oblysynda ortasha baǵa 2400 teńgeni qurap, resmi kórsetkishten 24%-ǵa tómen boldy. Qyzylorda jáne Túrkistan oblystarynda baǵa 2500 teńge deńgeiinde saqtalyp, tiisinshe naryqtan 18% jáne 13%-ǵa tómen boldy. Aqmola oblysynda da 13%-dan astam tómendeý tirkelip, 1,1 tonna et ótkizildi.
Elimizdiń shyǵysynda satylym kólemi salystyrmaly túrde tómen boldy. Shyǵys Qazaqstan oblysynda shamamen 1 tonna, Soltústik Qazaqstanda 0,6 tonna siyr eti satyldy. Eki óńirde de baǵalar naryqtan 10–14%-ǵa tómen boldy. Mańǵystaý jáne Atyraý oblystarynda satylym kólemi 1 tonnadan az bolsa da, jármeńkelerdegi halyqtyń belsendiligi joǵary boldy. Máselen, Aqtaýdaǵy jármeńkege 30 myńnan astam adam keldi.
Jármeńkeler Jambyl, Abai, Jetisý, Ulytaý jáne Almaty óńirleriniń oblys ortalyqtary men aýyldyq aýdandarynda da uiymdastyryldy. Bul óńirlerde siyr etinen bólek kókónister, sút ónimderi, bal jáne ózge de jergilikti taýarlar usynyldy. Jambyl oblysynda qosymsha 30 tonnadan astam baqsha daqyldary, kartop jáne mal azyǵy satyldy.
Jalpy respýblika boiynsha bir apta ishinde 203 tonnadan astam siyr eti ótkizildi. Ortasha baǵa kilogramyna 3085 teńgeni qurap, Ulttyq statistika biýrosy tirkegen deńgeiden 3,9%-ǵa tómen boldy. Aldyn ala esep boiynsha jármeńkelerge jalpy sany 190 myńnan astam turǵyn qatysty.
Jármeńkelerdi uiymdastyrý jáne ótkizý kúzgi maýsymda da jalǵasady. QR Saýda jáne integratsiia ministrligi ákimdiktermen birlesip, jármeńkelerdiń geografiiasyn keńeitýdi jáne áleýmettik mańyzy bar azyq-túlik taýarlarynyń baǵasyn turaqty deńgeide ustap turýdy kózdep otyr.
