Eldegi 3679 mekteptiń dabyl qondyrǵysy politsiia bólimshelerine jalǵandy. Bul týraly QR Ishki ister ministrligi aqparattandyrý jáne bailanys departamentiniń bas mamany Ádil Sársenov vedomstvonyń onlain brifinginde málim etti, dep habarlaidy QazAqparat tilshisi.
«Jalpy, balalardyń qaýipsizdigin qamtamasyz etý máselesi - Memleket basshysy men QR Úkimetiniń qatań baqylaýynda. Úkimettiń birqatar otyrystarynda atalǵan problema qaraldy. Osy keńesterdiń qorytyndysy boiynsha iri qalalarda ornalasqan bilim berý uiymdarynyń beinebaqylaý júielerin jaraqtandyrý boiynsha belsendi jumys júrip jatyr. Búgingi tańda búkil 7 370 bilim berý uiymy beinebaqylaý júiesimen jabdyqtalǵan, onyń 40 paiyzy iri qalalarda ornalasqan», - deidi Ádil Sársenov.
Aitýynsha, mektepterden kelip túsken beine derekterdi jedel basqarý ortalyqtary men ishki ister organdarynyń kezekshi bólimderi únemi nazarda ustaidy.
«Qazirgi ýaqytta barlyq bilim berý uiymdarynyń aýmaǵyndaǵy obektilerdiń syrtqy jáne ishki beinebaqylaý kameralaryn aýmaqtyq politsiia bólimderiniń jedel basqarý ortalyǵyna qosý boiynsha jumys jalǵasýda. Sonymen qatar, oblys ortalyqtary men iri qalalardyń mektepteri «SOS» batyrmasymen jabdyqtalǵan. Olardy mamandandyrylǵan kúzet qyzmetine jáne ishki ister organdaryna qosý boiynsha jumystar júrip jatyr. Sońǵy málimet boiynsha, mamandandyrylǵan kúzet qyzmetine mektep ǵimaratynyń 4 418 jáne politsiiaǵa – 3 679 dabyl qondyrǵysy qosylǵan», - dedi IIM ókili.
