Elde júikesi juqarǵan bala kóbeigen. Mamandar dabyl qaǵyp jatyr. Balalar men jasóspirimder arasynda psihikalyq aýrýǵa shaldyqqandar sany ótken jylmen salystyrǵanda 14 protsentke ósken. Elordanyń ózinde 3 myńǵa jýyq bala resmi tirkeýde tur. Olardyń qatary pandemiiadan keiin arta túsipti, dep habarlaidy "Ult aqparat" "Astana" telearnasyna silteme jasap.
Astana qalasy boiynsha 19 myń adam psihikalyq aýrýǵa shaldyqqan. Onyń 3 myńǵa jýyǵy 18 jasqa tolmaǵan balalar. Júikesi syr bergen 440 jasóspirim qazir shahardaǵy psihikalyq ortalyqta emdelip jatyr.
"Bizdi mazalap otyrǵan jáit, bul balalar men jasóspirimder arasyndaǵy psihikalyq aýytqýlardyń ósýi. 14-15 paiyzǵa ósip otyr", - deidi qalalyq psihikalyq densaýlyq ortalyǵy direktorynyń mindetin atqarýshy Gaýhar Bektaeva.
Elimizde psihikalyq densaýlyq "qazany" jabýly kúide tur. Keibiri, tipti, mundai aýrýdyń bar ekenin de bilmeidi. Endi biri balanyń boiyndaǵy ózgeristi baiqai tura, psihoterapevt kómegine júginýdi uiat sanaidy. Saldarynan búkil álemde bul derttiń jastar arasynda taralýy údei tústi, deidi dárigerler.
"Sebebi kóbi psihoterapiialyq densaýlyqqa nazar aýdarmaidy. Kóbi teris tárbie alady. Mysaly, bizdiń halyqta "shyda" deidi. Ártúrli kúizelister bolsa, ártúrli qiynshylyqtar men psihoterapiialyq soqqylar alyp otyrsa da, ol adam shydaidy", - deidi qalalyq psihikalyq densaýlyq ortalyǵynyń dárigeri Toqtar Qoishybekov.
Psiholog Laýra Jeksembaeva kerisinshe, qazir psihologtyń kómegine júginetin ata-ana qatary artqanyn aitty. Biraq barlyq otbasy emes, jastar ǵana júginetinin jetkizdi.
"25-35 jas aralyǵyndaǵy ata-analar qazirgi balalardyń psihikalyq jaǵdaiyna kóbirek kóńil bólip jatyr. Psihologqa júginip, alyp keledi. Tipti, balanyń minez-qulqynda bir ońashalaný, aralaspai qoiý, sondai ózgeshelikterdi baiqasa birden psihologqa ákelip jatady. Al 35 jastan asqan ata-analar kishkene qiyndaý. Olar ony qalypty jaǵdai dep esepteidi kóbinese nemese meniń balam durys emes, ózi sondai, ádeii isteidi dep oilaidy", - deidi ol.
Mamandar jaǵdaiǵa naqty ne sebep bolyp otyrǵanyn aita almady. Degenmen balaǵa ata-ana tarapynan kóńil bólinbeýdiń de salqyny tiip jatyr dep esepteidi. Muny elordalyq Serik Tókeev ta quptaidy.
"Úige barsań bala bir telefonda, áieliń bir telefonda, basqalar bári bir-bir telefonda otyrady. Burynǵydai "obshenie" joq. Bala tárbiesine áseri osy dep oilaimyn. Mysaly, balaǵa kóp kóńil bólý kerek qazir", - deidi ol.
Júikesi syr bergen jasóspirim qylmys jasap, kerek deseń óz-ózine qol jumsaýdan da taiynbaidy. Sondyqtan mamandar ata-analarǵa balasynyń boiynan qandai da bir oǵash qylyqty, aýytqýdy baiqasa, birden dáriger keńesine júginýdi usynady. Bul oqys jaǵdaidyń aldyn alýdyń alǵysharty ekenin eskertedi.
