Nursultan Nazarbaevqa Qazaqstan Pravoslav shirkeýiniń joǵary nagradasy – «Alǵys» ordeni tabys etildi, dep habarlaidy Elbasy.kz.
Qazaqstan Pravoslav shirkeýiniń basshysy, Astana jáne Qazaqstan mitropoliti Aleksandr Qazaqstannyń Tuńǵysh Prezidentine «Alǵys» ordenin tabys etip, Elbasynyń elimizdegi dinaralyq kelisimdi nyǵaitýǵa qosqan úlesin atap ótti.
– Siz Qazaqstannyń órkendeýi jolynda kóp sharýa atqardyńyz. Eń bastysy – dinaralyq tatýlyq pen ultaralyq kelisim. Bul – halyqqa jaily, berekeli jáne jaqsy ómir súrýge, memlekettiń damýyna múmkindik beretin qos tiregimiz. Qalyń kópshiliktiń atynan Sizge zor alǵys aitýǵa ruqsat etińiz. Siz bar ǵumyryńyzdy týǵan jerge qyzmet etýge arnadyńyz, – dedi Astana jáne Qazaqstan mitropoliti.
Nursultan Nazarbaev mitropolit Aleksandrǵa dinaralyq jáne etnosaralyq tatýlyq pen kelisimdi saqtaý isine sińirgen eńbegine joǵary baǵa bergeni úshin rizashylyǵyn bildirdi.
– Táýelsizdiktiń alǵashqy kúnderinen bastap biz toleranttylyqty, barlyq etnostar jáne dini konfessiialar dostyǵy men senimin nyǵaitý saiasatyn ustandyq. Birlik pen dostyq – turaqtylyq pen damýdyń kepili, – dedi Qazastannyń Tuńǵysh Prezidenti.
Elbasy pravoslav hristiandaryn jáne barsha qazaqstandyqtardy Rojdestvo merekesimen quttyqtady.
– Qazaqstannyń barlyq pravoslav hristiandaryn Rojdestvo merekesimen quttyqtaimyn. Olar elimizdiń damýyna, dostyq pen turaqtylyqty nyǵaitýǵa zor úles qosyp jatyr. Barshańyzǵa igilik, kóterińki kóńil-kúi jáne otbasy baqytyn tileimin, – dedi Nursultan Nazarbaev.
Qazaqstannyń Tuńǵysh Prezidenti qazirgi ýaqytta tatýlyq, tynyshtyq pen kelisim Qazaqstan qoǵamynyń ajyramas bóligi ekenin atap ótti.
– Koronavirýs indeti kúlli álemge tarady. Bizdiń elimizdi de ainalyp ótken joq. Alaida birliktiń arqasynda biz qazirgi qiyndyqtardy eńserip jatyrmyz. Bul synaqtardan súrinbei ótetinimizge kámil senemin, – dedi Elbasy.
Nursultan Nazarbaev barsha qazaqstandyqtardy aldaǵy Parlament Májilisi jáne barlyq deńgeidegi máslihat depýtattarynyń sailaýyna belsene qatysýǵa shaqyrdy.
– Sailaý – bolashaq damýymyzdy aiqyndaityn eleýli oqiǵa. Barlyq qazaqstandyqtardy sailaýǵa qatysýǵa jáne Qazaqstannyń órkendeýin, elimizdiń alǵa qadam basýyn, dinaralyq kelisimdi, dostyq pen baýyrlastyqty, barlyq etnostar men halyqtardyń ózara túsinistigin nyǵaitýdy qamtamasyz etetin baǵdarlamany tańdaýǵa shaqyramyn, – dedi Qazaqstannyń Tuńǵysh Prezidenti.
