Prezident Nursultan Nazarbaev Búkilálemdik 28-inshi qysqy Ýniversiada dodasynda el namysyn qorǵaityn sportshylarymyzǵa sáttilik tiledi, dep xabarlaidy Ult.kz tilshisi QazAqparat agenttigine silteme jasap.
«Qurmetti jas dostar, sportshylar! Búgin jastar úshin úlken mereke. Elimizdiń eń basty ýniversitetinde búgin Ýniversiada alaýy jaǵylady. Osy tórt-bes kúnniń ishinde osy Alaý búkil Qazaqstandy sharlap shyǵyp, eldiń sportshylarymyzǵa degen tilegin, armanyn qabyl alasyńdar. Sondyqtan ol jeńiske jetýge kómegin tigizetin bolady», - dedi Elbasy.
Memleket basshysynyń aitýynsha, mundai joǵary deńgeidegi sporttyq dodanyń Qazaqstanda ótýi úlken abyroi.
«Bul shara - tuńǵysh ret táýelsizdik jyldary ishinde jetken jetistigimizdiń biregeii, mundai dúniejúzilik dodany biz eshqashan ótkizip kórgenimiz joq. 57 eldiń sportshylary keletin bolady, 170 memlekettiń ishinen ótkizý quqyǵyna ie boldyq, bul, birinshiden, bizdiń elimiz úshin úlken abyroi. Qazaqstandy taǵy da barsha elderge pash etemiz, myńdaǵan jýrnalister bolady. Ekinshiden, jastardy sportqa baýlidy. Úshinshiden, salǵan jańa sport keshenderdiń barlyǵy bolashaqtaǵy elimizdiń sportshylaryna qyzmet etedi. Bizdiń 168 múshesi bar quramamyz alǵa sýyrylyp, barlyǵymyzdy qýantady dep senemin! Sizderge zor tabys tileimin, órkenderińiz óse bersin!», - dedi N. Nazarbaev.
Astanada QR Prezidenti Nursultan Nazarbaevtyń qatysýymen Búkilálemdik 28-shi qysqy Ýniversiadanyń Alaý estafetasy bastaý aldy. Alǵashqy Alaý Nazarbaev Ýniversitetinde tutandy. Ony qala kóshelerimen barlyǵy 60 alaýger alyp ótedi. Alaýgerler arasynda tanymal sportshylar men elordanyń qoǵam qairatkerleri bar.
Odan keiingi bes kún ishinde respýblikanyń barlyq oblys ortalyqtary óz Alaýlaryn jaǵatyn bolady. Estafetaǵa barlyǵy 1 myńǵa tarta alaýger qatyspaq. Sońynda Alaý Ýniversiada astanasy - Almaty qalasyna jetkiziledi.
.jpeg)