Qazaqstan Prezidenti Nursultan Nazarbaev Ujymdyq qaýipsizdik shart uiymynyń Ujymdyq qaýipsizdik keńesi sessiiasynyń kún tártibin atady, dep habarlaidy QazAqparat tilshisi.
Shaǵyn quramdaǵy otyrysty ashqan Memleket basshysy sessiia aiasynda UQShU hatshysynyń aqparaty tyńdalyp, Qazaqstannyń uiymǵa tóraǵalyǵynyń qorytyndysy shyǵarylatyndyǵyn atap ótti. Uiymǵa múshe memleketterdiń ujymdyq qaýipsizdigin qamtamasyz etýdiń ózekti máseleleri talqylanatyndyǵyn aitty.
«Sonymen qatar qyrǵyz tarapy UQShU-ǵa tóraǵalyǵy kezindegi basym baǵyttaryn usynatyn bolady. Óitkeni, tóraǵalyq osy elge ótedi. Búgin biz UQShU aiasyndaǵy keń aýqymdy baǵyt boiynsha júrgizilgen jumystar týraly aqparatty tyńdap, aǵymdaǵy halyqaralyq ahýal, ózara is-qimyldyń ózekti máseleleri jóninde pikir almasatyn bolamyz», - dedi Nursultan Nazarbaev.
Munan bólek, QR Prezidenti sessiianyń jalpy otyrysy aiasynda eki másele qaralyp, odan keiin kún tártibinde kózdelgen qujattarǵa qol qoiý rásimi bolatyndyǵyn eske saldy.
«Ujymdyq qaýipsizdik keńesiniń sheshimi men tórt halyqaralyq shartqa qol qoiýdy qosa alǵanda sessiianyń keńeitilgen kezeńine 1,5 saǵat bólingen. Degenmen, biz muny jedeldete de alamyz. Sebebi, maǵan baian etilgendei, barlyq máseleler bizdiń delegattarymyzben kelisilgen. Otyrys aiaqtalǵannan keiin baspasóz aldyna shyǵý bolady. Eger qarsylyqtaryńyz bolmasa jýrnalistermen ózim jáne Bas hatshynyń orynbasary Valerii Semerikov barady», - dep atap ótti Elbasy.
Osydan keiin Qazaqstan Prezidenti kún tártibi boiynsha aqparat berý úshin sózdi UQShU bas hatshysynyń orynbasary Valerii Semernikovke berdi.
«Kún tártibinde 23 másele bar. Buǵan qosa, shaǵyn quramda halyqaralyq jáne óńirlik qaýipsizdiktiń ózekti máseleleri men uiymǵa múshe memleketterdiń ózara-is-qimylyn qaraý usynylady», - dedi Valerii Semernikov.
Qazirgi ýaqytta otyrys jabyq esik jaǵdaiynda ótip jatyr.
Buǵan deiin elordada Ujymdyq qaýipsizdik shart uiymy Ujymdyq qaýipsizdik keńesiniń sessiiasy bastalǵanyn habarlaǵan edik.
