QR Prezidenti Nursultan Nazarbaevty qarsy alý rásiminde Halyq jinalysy úiiniń aldyndaǵy alańda qazaq halyq áni «Gúlderaiym» oryndaldy, dep habarlaidy «QazAqparat» HAA-nyń Qytaidaǵy menshikti tilshisi.
Keshe QR Prezidenti Nursultan Nazarbaevtyń QHR-ǵa memlekettik sapary aiasyndaǵy sharalar aiaqtaldy. Búgin jáne erteń Memleket basshysy Qytaidyń shyǵysyndaǵy Shandýn provintsiiasynyń Tsindao qalasynda ótetin Shanhai yntymaqtastyq uiymyna (ShYU) múshe elderdiń memleket basshylary sammitine qatysady.
Elbasynyń Beijińge memlekettik sapary barysynda Nursultan Nazarbaevtyń QHR Tóraǵasy Si Tszinpinmen kezdesý rásiminde alǵash ret Qytai halyq azat etýshi armiiasynyń áskeri orkestri qazaq halqynyń «Gúlderaiym» ánin oryndady. Án Qazaqstan jáne Qytai memlekettik ánurandarynan keiin shyrqaldy.
Eske sala keteiik, QHR Tóraǵasy Si Tszinpinmen kelissózder kezinde 9 birlesken qujatqa, sonyń ishinde birlesken málimdemege qol qoiyldy.
Eki eldiń basshylaryna tuńǵysh Qazaqstan-Qytai kinojobasy «Kompozitor» filmi usynyldy.
Sondai-aq, QR Prezidenti QHR Memlekettik keńesiniń Premeri Li Ketsianmen kezdesti.
Búkilqytailyq halyq ókilderi jinalysy Turaqty komitetiniń tóraǵasy Li Chjanshýmen kelissózder júrgizdi.
Beijińdegi Halyq batyrlary eskertkishine gúl shoǵyn qoiyp, qytailyq biznes kapitandaryn qabyldady.
Sapar aiasynda Qazaqstan-Qytai Iskerlik keńesiniń 5-shi otyrysy bolyp, onda jalpy somasy 13 mlrd dollardy quraityn 40-tan astam kelisimge qol qoiyldy.
