Nursultan Nazarbaev «Samuryq-Qazyna» ulttyq ál-aýqat qory» aktsionerlik qoǵamy basqarmasynyń tóraǵasy Ahmetjan Esimovti qabyldady, dep habarlaidy Elbasy.kz.
Kezdesý barysynda Elbasy qazirgi ekonomikalyq daǵdarystyń Qordyń barlyq kompaniialaryna áser etkenin atap ótti.
A.Esimovtiń málimeti boiynsha, Qordyń kompaniialar toby qyzmetkerlerdiń qysqarýyna jol bergen joq, barlyq kásiporyn jumysyn jalǵastyrýda. Sonymen qatar «Samuryq-Qazyna» ulttyq ál-aýqat qory» aktsionerlik qoǵamy basqarmasynyń tóraǵasy otandyq densaýlyq saqtaý júiesin qoldaý boiynsha júrgizilip jatqan jumystar týraly baiandady.
Qazaqstannyń Tuńǵysh Prezidenti «Samuryq-Qazyna» aktsionerlik qoǵamynyń koronavirýs pandemiiasyna qarsy kúreske barynsha atsalysý qajettigin atap ótti.
– Qordy basqarý jónindegi keńestiń tóraǵasy retinde «Samuryq-Qazynanyń» ishki rezervterinen iri megapolisterde – Nur-Sultan jáne Almaty qalalarynda eki meditsinalyq ortalyqtyń qurylysyna qarajat bólýdi tapsyramyn. Meditsinalyq ortalyqtardyń jumysy ǵylymi-zertteý áleýetin kúsheitýge baǵyttalady. Bul qadam keler urpaqty yqtimal qaterlerden saqtap qalýǵa múmkindik beredi. Úkimet pen ákimder bul bastamany qoldaidy degen senimdemin», - dedi Nursultan Nazarbaev.
Kezdesý sońynda Qazaqstannyń Tuńǵysh Prezidenti koronavirýs indetinen qaitys bolǵandardyń otbasylaryna taǵy da kóńil aityp, qazaqstandyqtardy barlyq qajetti qaýipsizdik sharalaryn qatań saqtaýǵa shaqyrdy.
