Qazaqstannyń barlyq óńirlerinde Elbasy N. Nazarbaevtyń «El úmiti» bastamasyna qatysqan jastar marapattaldy, dep habarlaidy "Ult aqparat".
Marapattaý rásimi Nursultan Nazarbaev Qory uiymdastyrǵan «Táýelsizdik jolyn jalǵastyrar urpaq» atty jastar forýmynda ótti.
Elbasy Nursultan Nazarbaev forým qatysýshylary aldynda sóilegen sózinde Táýelsizdiktiń alǵashqy jyldarynan bastap memlekettiń básekege qabiletti jastardy tárbieleýge basa nazar aýdaryp kele jatqanyn atap ótti.
«Jastar jyly aiasynda daryndy balalardy qoldaý maqsatynda men «El Úmiti» bastamasyn usyndym. Sonymen qatar, biz «Qamqorlyq» atty mańyzdy jobany iske asyra bastadyq», - dedi Elbasy.
Nursultan Nazarbaev «El Úmiti» jobasy eldiń belsendi jastaryn ziiatkerlik jáne shyǵarmashylyq damý, ulttyq mádeniet pen dástúrdi túsiný, muqtaj jandarǵa kómek kórsetý jolynda biriktirgenin aitty.
Forým aiasynda «Elbasy medali» jobasynyń qatysýshylaryna qola medaldar, halyqaralyq olimpiada júldegerleri men olardyń jattyqtyrýshylaryna «El maqtanyshy» syilyǵy jáne aýyl oqýshylary arasynda ótken «Myń bala» olimpiadasynyń jeńimpazdaryna syilyqtar tabystaldy.
«Búgin «El Úmiti» jáne «Qamqorlyq» bastamalaryna arnalǵan «Táýelsizdik jolyn jalǵastyrar urpaq» forýmy ótti. «El Úmiti» bastamasy aiasynda birqatar aýqymdy jobalar júzege asyrylýda. Birinshi joba – aýyl oqýshylaryna arnalǵan «Myń bala» olimpiadasy. Osylaisha Qazaqstan tarihynda alǵash ret aýyl oqýshylary úshin jalpyulttyq olimpiada uiymdastyryldy. Oǵan barlyq aýyl mektepteriniń 5-6 synyp oqýshylary qatysa alady. Biyl 300 myńǵa jýyq oqýshy qamtylyp, ekinshi kezeńdegi aqtyq saiysqa 5 myń adam jiberildi. Búgin barlyq óńirlerde myń jeńimpaz bala marapattalady. Osy oqý jylynan bastap 300-den astam jeńimpaz óńirlerdegi Daryn, Bilim innovatsiia litseii, Respýblikalyq Fizmat syndy daryndy balalarǵa arnalǵan mektepterde oqi alady. Qazir finalister men jeńimpazdar Elbasy Akademiiasy janyndaǵy «Birge Oqý» onlain mektebinde pándik daiyndyqtan ótip jatyr», - dedi «Elbasy Akademiiasy» KQ direktorynyń orynbasary Ánýar Janǵozin tilshilerge bergen suhbatynda.
Kelesi joba – «Elbasy medali» dep atalady. 14-29 jas aralyǵyndaǵy jastarǵa arnalǵan joba jastardy 7 negizgi baǵyt boiynsha tárbieleýge baǵyttalǵan. Onda 6 aidan 1,5 jylǵa deiingi qola, kúmis, altyn syndy qatysý deńgeiin tańdai alasyz.
«Búgin biz alǵash ret jobaǵa jarty jyl qatysqandarǵa qola medal tabystadyq. Kelesi jyly medalister sany kóbeiedi. Búginge deiin 300 medalist bolsa, keler jyly 6 myńnan astam qola, kúmis jáne altyn medal iegerleri bolady dep kútilýde. Al «El maqtanyshy» jobasy matematika, fizika, himiia, biologiia, informatika, geografiia, lingvistika pánderi boiynsha jeti negizgi olimpiadanyń jeńimpazdaryna arnalǵan. Ótken jyly Elbasy marapatty alǵash ret tabystady, biyl da ony jalǵastyramyz. Aqshalai yntalandyrý tek jeńimpazdar úshin ǵana emes, olardyń jattyqtyrýshylary úshin de qarastyrylǵan. Syiaqy mólsheri 500 myńnan 2 million teńgege deiin jetedi. Biyl 11 jeńimpaz ben 17 jattyqtyrýshy marapattaldy», - dep túsindirdi Á. Janǵozin.
«Salalyq menedjer» jobasy úlken býyn men kásibi mamandarǵa arnalǵan. Bul jobada 3 myń úmitkerden 230 maman iriktelip alyndy, olar 11 sala boiynsha baǵdarlamalardy júzege asyrýda. Olarǵa 37 tapsyrma berildi jáne olardy toptasyp ázirledi.
«Josparlardyń barlyǵy derlik Úkimetke, Premer-Ministrge tanystyryldy. Bul josparlar tek baǵdarlamalar deńgeiinde qalyp qoimai, kelesi jyly júzege asýy úshin salalyq ministrliktermen jumys júrip jatyr», - dedi Á. Janǵozin.
.jpeg)