Elbasy Aqmola oblysynyń ákimi Sergei Kýlagindi qabyldady. Bul týraly Aqordanyń baspasóz qyzmeti habarlady.
Kezdesý barysynda S.Kýlagin Memleket basshysyna óńirdiń negizgi áleýmettik-ekonomikalyq kórsetkishteri, memlekettik baǵdarlamalardyń júzege asyrylý barysy, sondai-aq aldaǵy kezeńge arnalǵan josparlary týraly baiandady.
Nursultan Nazarbaev óndiris kólemin ulǵaitý jáne jańa jumys oryndaryn ashý maqsatymen «Nurly jol» baǵdarlamasy aiasynda shaǵyn jáne orta biznesti qoldaý jumystaryn jalǵastyrý qajettigine nazar aýdardy. Qazaqstan Prezidenti jylý berý maýsymyna ýaqytyly ári sapaly daiyndalýdyń mańyzdylyǵyn da atap ótti.
Aqmola oblysynyń ákimi biylǵy birinshi jartyjyldyqtyń qorytyndysy boiynsha naqty sektor salalarynda ósim kórsetkishi qamtamasyz etilgenin aitty. Aitalyq, ónerkásip salasynda óndiristiń naqty kólem indeksi 106,5%-ke jetip, respýblika boiynsha kóshbasshy kórsetkishke ainaldy.
S.Kýlaginniń aitýynsha, Indýstriialandyrý kartasy aiasynda júzege asyrylǵan 62 joba 6 myńnan astam jumys ornyn ashýǵa múmkindik bergen. Jyl aiaǵyna deiin taǵy 20 jańa jobany iske qosý josparlanǵan. Aýyl sharýashylyǵynda mal basy men qustyń ósimi qamtamasyz etilip, mal sharýashylyǵy ónimderiniń óndirisi ulǵaidy. Óńirdegi aýyl sharýashylyǵy daqyldarynyń egis alqaby 4,2 million gektar bolsa, sonyń 3,8 million gektaryna astyq egilgen.
Qazaqstan Prezidentine Astananyń ainalasynda «azyq-túlik beldeýin» damytý aiasynda júrgizilip jatqan jumystar men iske qosý josparlanyp otyrǵan birqatar jańa jobalar týraly da baiandaldy.
Memleket basshysy kezdesý qorytyndysy boiynsha birqatar naqty tapsyrma berdi.
«Ult aqparat»
.jpeg)