QR Tuńǵysh Prezidenti - Elbasy qory janyndaǵy Memlekettik tildi damytý qory qazaq tilin úirenýge kómektesetin jańa jobalarmen tanystyrdy, dep habarlaidy QazAqparat tilshisi.
OQK-da ótken búgingi baspasóz máslihatynda SSoyle.kz onlain-kýrsynyń aǵylshynsha jáne latyn grafikasyndaǵy nusqasy, Android pen iOs platformalaryndaǵy Balasoyle mobildi qosymshasy, «Uly dala ańyzdary» («Legendy velikoi stepi») veb-grafikalyq romandar seriiasy, qazaq tilin úirenýge arnalǵan Soyletube videojobasy tanystyryldy. Jobalardyń ishindegi erekshe nazar aýdartatyny - bul SSoyle.kz onlain-kýrsynyń aǵylshynsha jáne latyn grafikasyndaǵy nusqasy. Osy ýaqytqa deiin qazaq tilin úirený múmkindigin tek orys tildi qoldanýshylar paidalansa, qazir onlain-kýrs shet elderde turatyn qazaqtar men aǵylshyn tildi sheteldikterge qoljetimdi bolyp otyr. Oǵan qosa portal arqyly jastar latyn grafikasyn meńgere alady.
«Búgingi kúni SSoyle.kz portalynda 115 myńnan astam adam til úirenýde. Ashylǵaly ony 5 millionnan astam qazaqstandyq jáne sheteldik qoldanǵan. Al áleýmettik jeliler arqyly kúndelikti 30 myń adam qazaq tilin úirenedi. Búgingi kúni «Soyle» mobildi qosymshasyn 50 myń adam júktegen. 2016 jyldan bastap «SSoyle.kz» ádistemesi boiynsha Skype arqyly qazaq tilin oqytý sabaqtary tegin júrgizilýde. «Astana» radiosynda aptasyna 3 ret qazaq tilin meńgerýge arnalǵan baǵdarlamalar ótkiziledi», - deidi QR Tuńǵysh Prezidenti - Elbasy qorynyń baspasóz-hatshysy Oksana Loskýtova.
Oksana Loskýtovanyń aitýynsha, Balasoyle mobildi qosymshasy damytatyn onlain oiyndar arqyly mektepke deiingi jáne mektep jasyndaǵy balalarǵa qazaq tilin úiretýde. Joba balalardyń durys sóileýine, grammatika erejelerin meńgerýge, sózdik qoryn damytýǵa jáne qorshaǵan ortany tanýǵa yqpal etedi. Kúndelikti portaldy 1,5 myń adam paidalanady.
Aita keterligi, barlyq jobalar QR Tuńǵysh Prezidenti - Elbasy qory jáne «Samruk-Kazyna Trust» áleýmettik jobalardy damytý qorynyń qoldaýymen ázirlengen. Qor «Uly dala ańyzdary» onlain jobasy aiasynda veb-grafikalyq romandar seriiasyn ázirleýdi qolǵa alyp, qazaq, orys jáne aǵylshyn tilderindegi «QQazcomics.kz» veb-saity men mobildi qosymshasy ázirlegen. «Uly dala ańyzdary» jobasy «Uly mahabbat týraly jeti hikaia» jáne «Qazaq jeriniń uly batyrlary» atty bólimderden, sonymen qatar qazaq halqynyń ǵasyrdan ǵasyrǵa, urpaqtan urpaqqa jetken tarihy men ańyzdarynan turady. Barlyq ańyzdar kópshilikke Qazaqstannyń kieli jerleri týraly tolyǵyraq málimet alýǵa múmkindik beredi.
«Samruk-Kazyna Trust» qory áleýmettik jáne til jobalaryn, atap aitqanda, qazaq tilin úirenýge baǵyttalǵan «SSoyle.kz» onlain-kýrstaryna qoldaý kórsetýde. Onlain-jobanyń kómegimen kóptegen ǵalamtor qoldanýshylary memlekettik tildi tegin úirenýge múmkindik aldy», - deidi qordyń áleýmettik jobalardy damytý qorynyń korporativtik kommýnikatsiialar departamentiniń direktory Miras Irgebaev.
Sonymen qatar, Memlekettik tildi damytý qory tanymal Youtube beine-platformasynda tildi meńgerýge arnalǵan paidaly beinesabaqtar toptamasyn ázirlegen. Beinesabaqtar qazaq tilinde durys sóileýdi jetildirýge baǵyttalǵan jáne kúndelikti turmysta jii qoldanylatyn mysaldardan turatyn dialog túrinde túsirilgen. Sabaqtar tildi jańadan úirenip bastaǵan jáne ony meńgerip alǵandarǵa kómektesetin resýrstar jinaqtalǵan. Qazirgi ýaqytta Youtube-arnasynda «Soyletube» arnasynyń 8 beineroligi júktelip otyr.
.jpeg)