Elbasy Nursultan Nazarbaev Konstitýtsiianyń 26-babyn keiinge shegere turý qajet dep sanaidy. Bul týraly ol Astanada ótip jatqan Parlament palatalarynyń birikken otyrysynda aitty, dep habarlaidy QazAqparat.
«Memleket basshysy Konstitýtsiianyń 26-babyn ózgerissiz qaldyrýdy usynǵanyn taǵy bir márte eske salyp: «Negizi, «Qazaqstan azamattarynyń» ornyna «árkim» degen ózgeristi engizýdi zańgerler qaýymy tolyǵymen qoldady. Sebebi sonyń arqasynda elimizge investitsiiany kóbirek tartýǵa múmkindik bar. Investorlardyń senimi de arta túsedi. Degenmen, asyǵystyq jasamai-aq qoialyq. Bizge konsensýs kerek. Osyny keńinen túsindirý qajet. Báribir biz oǵan kelemiz. Jer máselesinde de ondai bolady. Óitkeni iesiz jer tozady. Onyń qunarlyǵy joǵalady. Sondyqtan kúnderdiń kúninde ony túsinimýimiz kerek. «Iesi joq jer jetim» degen qazaqtyń sózi bar. Talai ret kórgenbiz, qýrai ósip, jerdiń tozyp ketkenin. Bul bapty keiinge shegere turaiyq»,-dedi Nursultan Nazarbaev Parlament palatalarynyń birlesken otyrysynda. Prezident zańdy jolmen ielengen kez kelgen jeke menshiktiń Konstitýtsiiamen qorǵalatynyna basa nazar aýdardy.
Aita ketsek, 1 naýryz kúni Memlekettik bilik tarmaqtary arasynda ókilettikterdi qaita bólý máseleleri jónindegi jumys tobynyń otyrysyna qatysqan Elbasy Nursultan Nazarbaev Konstitýtsiianyń 26-babyna ózgeris engizbeýdi usynǵan bolatyn.
