Elbasy halyq ártisi Álibek Dinishevti qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Kezdesýde Nursultan Nazarbaev pen Álibek Dinishev Qazaqstannyń mádenieti men ónerin damytýdyń qazirgi máseleleri, sondai-aq rýhani jańǵyrý úderisindegi shyǵarmashylyq ziialy qaýym ókilderiniń róli jóninde pikir almasty.
Memleket basshysy halyq ártisiniń mádeniet salasyna sińirgen zor eńbegin joǵary baǵalap, onyń elimizde ǵana emes, shet elderde de tanymal ekenin atap ótti.
Qazaqstan Prezidenti mádenietti damytýdy memlekettik deńgeide qoldaýdyń mańyzdylyǵyna nazar aýdaryp, sońǵy jyldary osy salada qol jetkizilgen naqty nátijelerge toqtaldy.
– Qazir elimizdiń mádeniet salasy baǵdarlamalyq maqalamda aiqyndalǵan baǵyttarǵa sáikes damyp keledi. Biz búkil álemge pash etiletin týyndylar jasaýǵa kiristik. Jańa opera jáne balet teatryn, kontsert zaldaryn saldyq, sonyń biri «Astana EKSPO-2017» kórmesiniń aýmaǵynda ornalasqan. Bári opera jáne balet teatrynda óner kórsetkisi kelip, sonda barýdy qalaidy, – dedi Nursultan Nazarbaev.
Á.Dinishev Elbasyǵa mádeniet pen ónerge kórsetken qoldaýy úshin alǵys aityp, «Astana EKSPO-2017» halyqaralyq kórmesinen alǵan áserimen bólisti, sondai-aq otandyq óner áleminde bolyp jatqan jańalyqtar jóninde áńgimeledi.
– Siz elimizde ónerdiń damýyna zor mán berip kelesiz, jańa mádeniet nysandary ashylyp, jańa shyǵarmashylyq ujymdar qurylýda. Osynyń barlyǵy ónerimiz arqyly Qazaqstandy álemge tanytý úshin jasalyp otyr, – dedi Á.Dinishev.
