Prezident Qasym-Jomart Kemeluly Toqaev basshylyǵymen iske asyp jatqan keshendi áleýmettik-ekonomikalyq jáne saiasi reformalardy zańnamalyq turǵyda qamtamasyz etý mańyzdy. Elbasy Nursultan Nazarbaev «Nur Otan» partiiasy Saiasi keńesiniń keńeitilgen otyrysynda osyndai pikir bildirdi, dep habarlaidy "Ult aqparat" QazAqparat agenttigine silteme jasap.
«Jańa zaman shyndyǵy áleýmettiń, memleketterdiń jáne tutas óńirlerdiń jikshildigin shielenistire tústi. Álemde ashyq popýlizm kóbeiip, adamdardyń dúnietanymy men minez-qulqyn ózgertip jatyr. Dástúrli ustyndar men otbasylyq qundylyqtarǵa qysym kúsheiýde. Jahandyq turaqsyzdyq bir-eki jyl ǵana sozylyp jatqan joq. Sondyqtan «Nur Otan»-nyń sońǵy parlamenttik sailaýda partiia usynǵan sailaý «Synaqtardy eńserip, birge jeńemiz!» urany ózekti bolyp qala beredi», - degen Nursultan Nazarbaev «Nur Otan» partiiasynyń mindeti adamdardy ajyratý emes, biriktirý ekenin atady.
«Bizdiń tarihymyz osy joldyń durystyǵyn dáleldedi. Búgin el Prezidenti Qasym-Jomart Kemeluly Toqaevtyń basshylyǵymen keshendi áleýmettik-ekonomikalyq jáne saiasi reformalar júzege asyrylýda. Olardy zańnamalyq qamtamasyz etý mańyzdy mánge ie bolyp otyr. Jańa Parlament jumys istei bastaǵannan beri Májilis qaraýyna 128 zań jobasy engizildi. 80 zań qabyldandy. Olardyń 19-yn «Nur Otan» fraktsiiasynyń depýtattary ázirledi», - dedi Tuńǵysh Prezident.
Onyń aitýynsha, depýtattar daǵdarysqa qarsy sharalardy qoldaýǵa baǵyttalǵan zańdardy ýaqtyly qabyldai otyryp, pandemiianyń kúrdeli kezeńinde tabysty jumys istegen.
«Depýtattyq korpýs bul jumysty jalǵastyrýǵa tiis. Barlyq qazaqstandyqtardyń Prezidenttiń nusqaǵan memlekettik baǵdar tóńireginde toptasyp, ony iske asyrý úshin birge jumys isteýi mańyzdy. «Nur Otan» partiiasy bilik pen qoǵamdy biriktire otyryp, bul máselemen belsendi túrde ainalysýy tiis», - dedi Elbasy.
