Qazaqstan prezidenti Nursultan Nazarbaev Batys Qazaqstan oblysyna jumys saparymen bardy, dep habarlaidy Aqorda baspasóz qyzmeti.
Memleket basshysy Oral qalasynda "Batys Qazaqstan mashina jasaý kompaniiasy" AQ-na baryp, kómirsýtegi shikizatyn óndirý jáne tasymaldaý salasynda paidalanylatyn qurylǵylar men jabdyqtar jasaý úderisimen tanysty.
Budan bólek, Elbasy taýyq etin óndirýge jáne daiyndaýǵa mamandanǵan "Jaiyq Agro LTD" JShS-niń tamaq kásiporny jumysymen tanysty.
Sondai-aq, Nursultan Nazarbaevqa "Miasodel" jáne "Kýblei" brendteriniń et ónimderin daiyndaýmen jáne óndirýmen ainalysatyn jergilikti kásiporyndardyń jumystary týraly baiandaldy.
Oral qalasynda memleket basshysy "Kvant" jaýapkershiligi shekteýli seriktestiginiń jihaz fabrikasyna barǵan. Qazaqstan prezidentine kásiporynnyń qazirgi qarjy-sharýashylyq jaǵdaiy týraly málimdelip, óndiris aýqymyn ulǵaitý jáne daiyn ónim tizbesin keńeitý jospary jóninde aityldy.
Fabrikany aralaý kezinde Nursultan Nazarbaevqa óńirdiń áleýmettik-ekonomikalyq damý barysy, sonyń ishinde ónerkásip sektorynyń, shaǵyn jáne orta biznestiń qazirgi ahýaly men perspektivalary jóninde málimet berildi.
