Búgin Elbasy Nursultan Nazarbaevtyń «Uly dalanyń jeti qyry» atty maqalasy jariialandy. Maqalada túrki órkenietin damytýǵa qatysty birqatar maqsat-mindetter belgilendi.
Túrkitanýshy Nápil Bazylhannyń aitýynsha, atalǵan maqalanyń strategiialyq mańyzy zor. Sebebi onda bizdiń ótkenimiz ben bolashaǵymyzǵa qatysty oilar qamtylyp otyr.
«Bul - baǵdarlamalyq maqala. Prezident kóshpeliler órkenietiniń negizgi besigi Altai ekenin, tańǵajaiyp ań stilin, mifologiiany - bárin anyq kórsetti. Memleket basshysy tól tarihyn biletin, baǵalaityn jáne maqtan etetin urpaqtyń bolashaǵy zor bolady deidi. Sondyqtan bul - búgingi bolmysymyzdy saraptap, bolashaǵymyzdy baǵamdaýǵa arnalǵan maqala. Onyń strategiialyq mańyzy zor», - deidi N.Bazylhan.
Ǵalymnyń sózine qaraǵanda, Prezident «Uly dalanyń jeti qyry» maqalasy arqyly barlyq tarihshylarǵa úndeý jasap otyr. Sonyń ishinde túrkitanýshylarǵa da aýqymdy sharalardy qolǵa alý qajet.
«Máselen, «Túrki órkenieti: túp tamyrynan qazirgi zamanǵa deiin» atty joba týraly jazyldy. Negizi, túrki álemi - bul úlken álem. Ol Eýraziiany tolyǵymen qamtidy. Oǵan qatysty tarihtyń biraz qyrlary áli de túpkilikti zerttelmegen. Sondyqtan Prezident túrki halyqtarynyń tarihyn keshendi túrde qaraýǵa úndeý tastap otyr. Sebebi onyń ishinde arheologiia, etnografiia, mádeniet pen óner, folklor jáne taǵy basqa salalar bar. Osy jumysqa túrki álemin zerttep júrgen otandyq bolsyn, sheteldik bolsyn, barlyq ǵalymdar atsalysýy qajet dep oilaimyz. Budan bólek, Memleket basshysy túrki halyqtaryna ortaq týyndylardyń biryńǵai onlain kitaphanasyn ashýdy usyndy. Bul - óte oryndy ideia. Sebebi biz zaman talabyna sai damýǵa tiispiz. Qazirgi tehnologiialardy jan-jaqty qoldanǵan jón. Sonda túrki álemine qatysty tarihi derekterdi onlain kitaphana arqyly oqýǵa múmkindik týady», - dep atap kórsetti N.Bazylhan.
Aita keteiik, óz maqalasynda Prezident Qazaqstannyń kúlli túrki halyqtarynyń qasietti «Qara shańyraǵy» ekenin, sondai-aq, qazaqtyń saiyn dalasynan álemniń ár túkpirine taraǵan túrki tektes taipalar men halyqtardyń basqa elder men óńirlerdiń tarihi úderisterine eleýli úles qosqanyn erekshe atap ótti.
«Osyǵan bailanysty, «Túrki órkenieti: túp tamyrynan qazirgi zamanǵa deiin» atty jobany qolǵa alý qajet. Bul joba aiasynda 2019 jyly Astanada Túrkologtardyń dúniejúzilik kongresin jáne ártúrli elder mýzeileriniń ekspozitsiialaryna ejelgi túrki jádigerleri qoiylatyn Túrki halyqtarynyń mádeni kúnderin uiymdastyrý kerek. Sondai-aq, Vikipediianyń úlgisinde Qazaqstannyń moderatorlyǵymen Túrki halyqtaryna ortaq týyndylardyń biryńǵai onlain kitaphanasyn ashý da mańyzdy. Sonymen qatar, jańa oblys ortalyǵy retinde Túrkistandy damytý barysynda onyń halyqaralyq arenadaǵy bedelin júieli túrde arttyrý qajet. Qazaqstannyń ejelgi astanasy halqymyzdyń rýhani ortalyǵy ǵana emes, sondai-aq, búkil túrki álemi úshin kieli oryn bolyp sanalady», - delingen maqalada.
.jpeg)