Qazaqstannyń Tuńǵysh Prezidenti Nursultan Nazarbaevtyń tóraǵalyǵymen ótken «Nur Otan» partiiasynyń Saiasi keńesi Biýrosynyń otyrysynda Elbasy partiialastarynyń aldynda qandai mindetter turǵanyn atady, dep habarlaidy QazAqparat tilshisi.
Otyrys barysynda partiia baǵdarlamalarynyń oryndalý barysy men aldaǵy kezeńge arnalǵan jumystyń basym baǵyttary qaraldy. Keńesti asha otyryp Elbasy 20 jyl ishinde «Nur Otan» eldiń qýatty saiasi kúshine ainalǵanyn atap ótti.
«Eń qiyn kezeńderde bizdiń partiia bir arnada jumys isteý úshin adamdar men saiasatkerlerdi uiystyra bildi. Biz beibitshilik pen etnosaralyq kelisimdi, saiasi turaqtylyqty saqtap qaldyq. Osynyń arqasynda kóptegen jetistikke jettik. Bul yntymaq bizdiń elimizdi «daǵdarys qyspaǵynan» alyp shyǵyp, investitsiia tartýǵa, myńdaǵan jańa kásiporyn ashýǵa, halyqty jumys oryndarymen qamtamasyz etýge múmkindik berdi. Eń bastysy, Táýelsizdigimizdi saqtap, ony nyǵaityp aldyq, - dedi Qazaqstannyń Tuńǵysh Prezidenti.
Nursultan Nazarbaev jahandyq ózgerister jaǵdaiynda partiia aldynda jańa jáne odan da kúrdeli mindetter turǵanyn atap ótti.
«Qazaqstan, basqa da tez damyp kele jatqan elder siiaqty «Orta tabys tuzaǵyna» tap boldy. Búkil álem boiynsha orta tap kiristeriniń stagnatsiiasy baiqalady. Sondai-aq, teris jahandyq trendter de eleýli yqpal etetinin de aita ketý kerek», - dedi partiia Tóraǵasy.
Elbasy azamattardyń ósip kele jatqan suranystaryna der kezinde den qoiý qajettigin atap ótti.
«Sonymen qatar, qiyndyqtarǵa qaramastan, 2050 jylǵa deiingi Strategiiada belgilengen basty maqsatty - damyǵan 30 memlekettiń qataryna kirýdi, iaǵni qazaqstandyqtardyń ómir súrý sapasyn damyǵan elderdiń deńgeiine kóterý maqsatyn umytpaýymyz kerek. Buǵan qol jetkizý úshin, birinshi kezekte, turaqtylyq, birlik jáne eń bastysy – barlyq qazaqstandyqtardyń eńbekqorlyǵy qajet. Bizdiń árqaisymyzǵa muny túsingen abzal. Bul joldy barlyq otyzdyqqa engen elder júrip ótken, - dedi Qazaqstannyń Tuńǵysh Prezidenti.
Nursultan Nazarbaev 2050 jylǵa deiingi Strategiialyq damý baǵytynyń maqsattaryna qol jetkizý baǵytynda partiia jumysynyń basym baǵyttaryna toqtaldy.
«Bul úshin bizdiń partiia, birinshiden, qoǵamdy biriktirip, eldiń saiasi basshylyǵynyń birligin bekemdeýi tiis. Ishki birlik pen kelisim bar da – órkendeý de bolady. Ekinshiden, naqty partiialyq sáikestik pen qatań tártip, atqarýshy biliktiń jaýapkershiligi qajet», - dedi partiia Tóraǵasy.
Elbasy Májilis pen máslihattardaǵy sailaý naýqanyna sapaly daiyndyq júrgizýdiń mańyzdylyǵyna toqtaldy.
«Alda bizdi Konstitýtsiialyq merzimde ótetin Májilistegi mańyzdy sailaý kútip tur. Ótken jyly zańnamaǵa engizilgen túzetýlerge sáikes, Májilistegi sailaý sekildi máslihattarda da kelesi sailaý alǵash ret partiialyq tizimder boiynsha ótedi. Biz jeńiske jetýdi jáne uzaq merzimdi saiasi kóshbasshylyqty maqsat etip otyrmyz. Sondyqtan aldaǵy sailaý naýqanyna daiyndyqty dál búginnen bastaý kerek, - dedi Qazaqstannyń Tuńǵysh Prezidenti.
Elbasy sondai-aq barlyq azamattardy memlekettiń ótkir áleýmettik-ekonomikalyq problemalaryn sheshý úshin partiiaǵa qosylýǵa shaqyrdy.
«Biz óz usynystaryn bere bastaǵan belsendi azamattardy, blogerlerdi kórip, estip otyrmyz. Eger olar shyn máninde bizdiń elimizdiń qamyn jese, biz olardy usynylǵan ideialardy júzege asyrý úshin partiiamen birlesip jumys isteýge shaqyramyz», - dedi partiia Tóraǵasy.
Nursultan Nazarbaev el aimaqtaryndaǵy azamattardyń problemalaryn sheshýde «Nur Otan» partiiasynyń jumysyn jandandyrý qajettigin atap ótti.
««Nur Otan partiiasynyń mindeti – tiimdi qoǵamdyq jáne partiialyq baqylaý, bizdiń halyqqa bergen barlyq ýádelerdi sapaly oryndaý, «Bes institýtsionaldyq reformany», partiianyń 2021 jylǵa deiingi sailaýaldy baǵdarlamasyn, sailanǵan Prezident Qasym-Jomart Kemeluly Toqaevtyń baǵdarlamasyn iske asyrý. Olardyń barlyǵy qazaqstandyqtardyń ómirin jaqsartýǵa baǵyttalǵan», - dedi Elbasy.
Sonymen qatar, «Nur Otan» partiiasynyń tóraǵasy Qoǵamnyń partiiaǵa senimin arttyrý maqsatynda aqparattyq-ideologiialyq strategiiany qabyldaýdyń mańyzdylyǵyna nazar aýdardy.
«Problemalar týraly ashyq aityp, olardy naqty ornynda sheshilýine qol jetkizý qajet. Bizdiń mindetimiz - qoǵamdaǵy senim ahýalyn qalyptastyrý. Ol úshin barlyq qoǵamdyq, saiasi kúshterdiń, biznestiń, intelligentsiianyń, sarapshylar men azamattardyń dialogy qajet. Barlyq qolda bar alańdardy paidalanǵan abzal. Naqty problemalardy sheshý úshin maqsatty jumys bolýy tiis. Biz azamattarǵa bolashaqqa degen senim berýge tiispiz», - dedi Nursultan Nazarbaev.
Partiianyń Saiasi keńesi Biýrosynyń otyrysy barysynda «Nur Otan» partiiasynyń partiialyq tizimi boiynsha Parlament Májilisi depýtattarynyń mandattaryn G. N. Ábdiqalyqovaǵa, N. B. Álimjanovqa, N. Q. Áshimbetovke jáne J. Q. Omarbekovaǵa berý týraly sheshim qabyldandy.
.jpeg)