QR Prezidenti Ákimshiligi Ótinishterdi qarastyrýdy qadaǵalaý bólimi biylǵy jyl basynan beri elimizdiń ár óńirinen 401 azamatty qabyldady, dep habarlaidy "Ult aqparat".
Málim etilgendei, Batys Qazaqstan oblysynyń Oral qalasyna kóshpeli qabyldaý (22 adam) da uiymdastyrylǵan. Budan bólek, óńir turǵyndaryna qolaily bolýy úshin, barlyq oblystar men Almaty jáne Shymkent qalalarynyń ákimdikterin selektorlyq júiege qosa otyryp, 75 adamnyń ótinishi qarastyryldy.
Ótinishterdiń basym bóligi Nur-Sultan (37,4%) men Almaty (9,2%) qalalary, Batys Qazaqstan (7,7%) jáne Qaraǵandy (6,2%) oblystary men Shymkent (5,4%) qalasynyń turǵyndarynan túsken. Atap aitqanda, Nur-Sultannan – 150 adam, Almaty qalasynan – 37, BQO-dan – 31, Qaraǵandy oblysynan – 25, Shymkent qalasynan – 22, Aqmola oblysynan – 22, ShQO-dan – 21, Mańǵystaý oblysynan – 15, Almaty oblysynan – 13, Pavlodar oblysynan – 11, Jambyl oblysynan – 10, Túrkistan oblysynan – 10, Qostanai oblysynan – 10, SQO-dan – 8, Qyzylorda oblysynan – 5, Aqtóbe oblysynan – 4 jáne Atyraý oblysynan 2 azamat júgingen.
«Azamattar kóbinese quqyq qorǵaý organdary (33%) men sot organdarynyń (16%) qyzmetine, jergilikti atqarýshy organdardyń jumysyna (29%) qatysty, bank salasyna (8,2%), densaýly saqtaý salasyna (2,6%), zeinetpen qamtý salasyna (2%) qatysty aryz-shaǵymdar túsirip jatady. Basqa da sabaqtas máseleler 20% shamasynda. Qabyldaýǵa jazylmaqshy niettegi adamdardyń sany arta túsýine bailanysty qazirgi shaqta qaita qabyldaýlardy qysqartý sharalary qarastyrylyp jatyr. Osy maqsatta qaita qabyldaýǵa jazylǵan azamattardyń ótinishteri saraptaýdan ótkizildi.
Biylǵy naýryz aiyna túsken 150 shaǵymdy teksergende, onyń ishinde 47 adamnyń, tyńǵylyqty jaýap alǵanyna nemese shaǵymdarynyń negizdi túrde qanaǵattandyrylmaǵanyna qaramastan, qaita shaǵymdanǵany belgili boldy», - dedi QR Prezidenti Ákimshiligi Ótinishterdi qarastyrýdy qadaǵalaý bóliminen.
Esepti kezeńde táýelsiz zańgerler, memlekettik organdar bergen jaýaptarǵa jasalǵan saraptama negizinde, 36 qorytyndy daiyndap shyqqan. «Qazirgi ýaqytta osyndai jumys sáýir-mamyr aiyna qabyldaýǵa jazylǵan ótinishterge de qatysty júrgizilip jatyr. Jalpy alǵanda, júrgizilgen keshendi sharalardyń arqasynda, QR PÁ qabyldaýyna ótinish túsirgen azamattardyń problemalaryn sheshý barysynda jaǵymdy ózgerister bolǵany baiqalady», - delingen aqparatta.
