Astana qalasy ákimdiginiń qoldaýymen Sáken Seifýllin murajaiy osymen segizinshi ret ótkizgeli otyrǵan dástúrli músháiraǵa elimizdiń barlyq aqyndaryn taǵy da alaman jyr báigesine qatysyp, óz baqtaryn synaýǵa shaqyrady. Bul jolǵy músháiranyń jyr arqaýy– «El tiregi - Elorda».
Araily Azattyq aiasynda erkin tynystap, óz aldymyzǵa shańyraq kóterip, Tý tigip, eldigimizdi álemge áigilep otyrǵanymyzǵa shirek ǵasyrdan asty. Osy qysqa ǵana ýaqyttyń ishinde qanshama jetistikterge qol jetkizdik. El ordasy salynyp, el irgesi bekidi. Elbasynyń batyl bastamasymen Saryarqa tósinde boi kóterip, aidai álemge tanylǵan Astana biyl jiyrma jasqa toldy.
Buǵan deiingi jyr báigesinde Táýelsizdiktiń mereiin asqaqtatyp, halqymyzdyń azattyq jolyndaǵy alapat kúresin, búgingi jańa zamannyń jańa tarihyn, Elbasynyń eren erligin, el basqarýdaǵy kóregen saiasatyn shabyttana jyrǵa qosqan Serik Aqsuńqaruly, Serik Turǵynbekov, Ǵalym Jailybai, Ońaigúl Turjan, Ádilbek Ybyraiymuly syndy belgili aqyndarymyzben qatar, jas talanttar Arman Sherizat, Áskerhan Aqtai músháiranyń bas báigesin qanjyǵalaryna bailanǵan bolatyn.
Astana toiyna arnalǵan biylǵy músháiranyń da kózdegeni - Elordanyń aishyqty kelbetin, azattyq jolynda arpalysyp ótken babalar kúresin,elimizdiń búgingi jarqyn ómirin, erteńgi urpaq muratyn jyrlaý. Qazaq jyrynyń qorjynyna olja salý.
Taqyryp aiasynyń kókjiegi óte keń. Súiine jyrlap, súbeli shyǵarma týdyrý ár aqynnyń óz shabytyna bailanysty. Endeshe júirikterdi jyr máresinde kútemiz!
Músháira júldeleriniń qarjylai kólemi óte qomaqty:
Bas júlde – bireý
Birinshi oryn – bireý
Ekinshi oryn - ekeý
Úshinshi oryn – úsheý
Múshairaǵa esh jerde jaryq kórmegen tolǵaýlar, toptama óleńder 2018 jyldyń maýsym aiynyń 1 – ne deiin qabyldanady.
Múshaira qorytyndysy Astana kúni qarsańynda jariialanyp, marapattaý rásimi ótedi.
Úmitkerler shyǵarmasyn kompiýterde terip, 5 danasyn tómendegi meken – jaiǵa jiberý kerek nemese astanakalamger@mail.ru elektrondyq poshtaǵa joldaýǵa bolady.
Avtordyń aty-jóni, meken-jaiy, bailanys telefony, elektrondyq poshtasy(bar bolsa) mindetti túrde kórsetilýi kerek.
Indeks: 010000, Astana qalasy, M.Áýezov kóshesi 20 «a» úi, Sáken Seifýllin murajaiy. Tel. 8(7172)32-84-67, 53-34-03.
Júldegerlerdiń Astanaǵa kelip-ketýdegi barlyq shyǵynyn uiymdastyrýshy tarap moinyna almaidy.
