Kezekti Joldaýda basty nazar salatyn dúnie retinde urpaqqa qamqorlyq jaiyn aitar edim. Áýeli 18 jasqa tolǵanynsha balalar esebine Ulttyq qordan qarjy aýdarýdyń jóndi sheshim bolǵany anyq. Sondai-aq, balabaqshalardan bastap, orta bilim, joǵary oqý oryndarynyń máselesine erekshe kóńil bólinip, zer salynǵanyn ańǵardyq.
Sanaly urpaqtyń qalyptasyp, el damýynyń kepili bolýynda bilim berý salasynyń mańyzy airyqsha. Keleshek tarih bárinen buryn urpaqtyń qolymen óriledi. Sondyqtan olardyń otbasynda alatyn tárbiesi, balabaqshadan kóretin tálimi, mektep qabyrǵasynda jiiatyn bilimi men úlken ómirge qadam basar aldynda, bilikti maman bolyp qalyptasar kezinde oqyǵany sapaly bolǵany abzal.
Biyl ulttyń ulyǵy Ahmet Baitursynulynyń mereitoiy qarsańyna tuspa-tus kelgen memlekettiń jańa bastamalary jemisti bolaryna úmittenemin. Talai tarihi kezeńderdiń tezinen ótken eldiń keleshektegi joly burynǵydan basqa, jaqsy baǵytta bolýy tiis. Munyń bári jańa tarihtyń qalyptasýynda yqpal etedi.
Eń aldymen halyqtyń áleýmettik jaiyn ár kezde de umyt qaldyrmaýymyz qajet. Ol úshin saiasi qundylyqtardan bastap, bergisi ulttyq qundylyqtardy qadirlep, durys negizde dáriptei alýymyz mańyzdy. Memleket jeri, onyń qazba-bailyǵy halyqtyń menshigi bolyp sanalatyny jii aitylyp jatyr. El igiligi jolynda atqarylǵan árbir istiń baǵasy qymbat ekeni daýsyz.
Jambyl Artyqbaev,
tarih ǵylymynyń doktory
