Memleket basshysynyń latyn álipbiine aýysý týraly bastamasyna elimizdiń Olimpiada chempiondary, sport qairatkerleri, sporttyq mekemeler ujymdary da qyzý qoldaý bildirýde. Buǵan Elbasynyń atyna kelip-túsip jatqan hattar dálel bola alady.
XXXI jazǵy Olimpiada oiyndarynyń kúmis júldegeri Jazira Japparqul barlyq qazaqstandyq sportshylardyń atynan Elbasyna el sportyn damytýǵa qosqan qomaqty úlesi úshin zor alǵysyn bildirdi. «Aǵymdaǵy jyldyń sáýir aiynda shyqqan «Bolashaqqa baǵdar: rýhani jańǵyrý» atty Sizdiń maqalańyzdy muqiiat oqyp, odan alǵan sheksiz qýanyshymdy sózben jetkize almaspyn. Osy maqalada qazaq tilin latyn álipbiine kóshirý týraly bastama birden kóńilimnen shyqty. Mundai qadam qoǵamdyq sanany jańǵyrtýdyń negizgi qaǵidalaryn qalyptastyrýǵa ǵana emes, sonymen qatar búgingi zamanǵa sai damýymyzǵa igi yqpal etetini kúmánsiz. Osy baǵyttaǵy Sizdiń saliqaly saiasatyńyzdyń nátijesinde Qazaqstan azamattaryn tek jarqyn bolashaq kútip turǵanyn senimmen aita alamyn»,- delingen Olimpiada jeńimpazynyń hatynda.
Qazaq tili álipbiiniń kirill qarpinen latyn qarpine aýysýyn qoldaǵan ujymdardyń qatarynda: «Qazirgi bessaiystan jáne sý sporty túrlerinen olimpiadalyq daiarlaý ortalyǵy» RMQK, «Dene shynyqtyrý jáne sport boiynsha respýblikalyq oqý-ádistemelik jáne taldaý ortalyǵy» RMQK, «Dene múmkindikteri shekteýli tulǵalarǵa arnalǵan sporttyq daiarlaý ortalyǵy» RMQK jáne t.b. bar.
«Qazaq tilin jańǵyrtý qajettiligi onyń barlyq áleýetin tek kommýnikatsiia quraly retinde ǵana ashyp qoimai, ulttyq sáikestikti nyǵaitý, ulttyq jandanýdyń qýatty faktory retinde tanytýda. Álipbidiń reformasy tarihi alǵysharttarǵa negizdelgen. Ol Qazaqstannyń jahandyq básekelestigin joǵarylatýǵa, álemniń ǵylymi-tanymdyq, tehnologiialyq jáne kommýnikatsiialyq keńistigine qarqyndy birigýge baǵyttalǵan», - degen ustanymyn bildiripti hat joldaýshylar.
Dene múmkindikteri shekteýli tulǵalarǵa arnalǵan sporttyq daiarlaý ortalyǵynyń direktory A. Tiýmteev óz hatynda: «Latyn álipbiine kóshýdi biraýyzdan qoldaimyz. Birinshiden, bul jastarymyzdyń bolashaqta damýyna úlken septigin tigizedi. Bul bizdiń qoǵamnyń álemdegi eń damyǵan ǵylymǵa, ádebietke jaqyndaýyna zor yqpalyn tigizedi. Latyn qarpine kóshý sondai-aq túrki halyqtarymen qarym-qatynasty nyǵaitýǵa úlken septigin tigizedi»,-dep jazady.
