Foto: Maqsat Shaǵyrbaev/Kazinform
Buǵan deiin elimizdegi sý tasqynyna bailanysty sońǵy qońyraý saltanaty ótkizilmeitini aitylǵan-dy. Bul aqparat qoǵamda biraz talqyǵa túsip, kópshiligi qarsylyq tanytty. Búgin QR Oqý-aǵartý ministrliginiń apparattyq otyrysynda ministr Ǵani Beisembaev elimizdegi 186 myń mektep bitirýshi úshin oqý jylynyń aiaqtalýyna arnalǵan sońǵy qońyraý sharasyn 25 mamyrda ótkizýdi tapsyrdy, dep habarlaidy «Ult aqparat» Kazinform-ǵa silteme jasap.
«Biylǵy oqý jyly 25 mamyrda aiaqtalatynyn qatań eskertemin. Osyǵan orai oqý baǵdarlamasyn jyl boiyna tabysty meńgergen 3,8 millionnan astam oqýshy kelesi synyptarǵa kóshirilsin. Mekteptiń 1-10 synyp oqýshylaryna «Bilimim Otanyma» taqyrybyndaǵy biryńǵai synyp saǵatyn ótkizý 24 mamyr juma kúnine josparlansyn. Bul byltyrǵy jyldyń qyrkúiek aiynda engizilgen «Birtutas tárbie baǵdarlamasy» sheńberinde qabyldanǵan josparǵa sáikes uiymdastyrylýy tiis. Áriptesterimizdiń usynysy boiynsha elimizde mamyr aiynda «Yntymaq aiy» ailyǵyn ótkizý josparlanǵan. Onyń aiasynda «Taza Qazaqstan», «Igi ister», «Kanikýlda kitap oqiyq» jáne basqa sharalar qarastyrylǵan. Sonymen qatar, elimizdegi 186 myń mektep bitirýshi úshin oqý jylynyń aiaqtalýyna arnalǵan sońǵy qońyraý sharasyn 25 mamyrda ótkizýdi tapsyramyn», — dedi ministr.
Jiyn barysynda Ǵani Beisembaev tótenshe jaǵdai kezinde evakýatsiialyq pýnkte balalar men turǵyndarǵa psihologiialyq kómek kórsetken 400 den astam mektep psihology, óz mindetin atqara júrip, kelgen qiyndyqty elmen birge eńserýge qatysqan 29 myńnan astam pedagog pen bilim salasy qyzmetkerleriniń ólsheýsiz eńbegin erekshe atap ótti.
