Álemniń basyna túsken synaq Qazaqstandy da ainalyp ótpedi. Kúdik pen úmit tarazyǵa túsip tur. Biz qazir koronavirýsqa qarsy kúrestiń jalpyulttyq sipatqa ie bolǵanyna kýá bolyp otyrmyz. Qýanyp otyrmyz degen artyq shyǵar, bilik pen buqaranyń birigip, tótennen tóngen qaýipke qarsy turǵanyna súiinbeske bolmas.
Tótenshe jaǵdai jariialanǵaly beri qyzmet barysymen Almaty men Almaty oblysynyń aýmaǵyn aralaýmen júrmiz. Bastapqy da baiqaǵanymyz: jurt kóńilinde alań men dúrligý basym edi. Qazir el birtoǵa sabyrly. Qalany karantinge japqan alǵashqy kúni abdyraǵan adamdar Almaty ákimi men oblys ákiminiń baqylaý beketterine barǵanyn kórip, bir-birin sabyrǵa shaqyryp jatty. Demek, turǵyndar eń aldymen bilikke senim artady degen sóz. Ertesi Memleket Basshysy Qasym-Jomart Toqaevtyń Nur-Sultan qalasynyń shekarsyna qoiylǵan blokpostqa barǵany jaily aqparat alańdaýly kóńildi basyp, senimdi ulǵaitty. Elbasy Nursultan Nazarbaevtyń úndeýinen keiin buqara halyq qana emes, saiasi elita, onyń ishinde qaltaly azamattar indetpen kúresýge birigip, qarjy bólip jatyr. Munyń bári el basyna kún týǵanda ortaq maqsatqa jumylýdyń úlgisi.
Indet irgeden alystar. Uly dala men nurly qalada qalypty tirshilik yrǵaqqa túser. Sol kúnderde qazaqtyń, Qazaqstannyń birligine bárimiz súisinip, bolashaqqa aityp jetkizer úlken is atqarǵanymyzdy uǵarmyz. Sol mezetke tórt kózimiz túgel jeteiik!
Qalmahanbet MUQAMETQALI,
Qazaqstan jazýshylar odaǵynyń múshesi
