Belarýstegi Ulttyq ekzit-poll nátijesine sai, Aleksandr Lýkashenko 9 tamyzda ótken prezident sailaýynda 79,9% daýys alǵan. Bul týraly "Belarýs 1" memlekettik telearnasy habarlady. Biliktiń ekzit-polly Lýkashenkonyń basty qarsylasy Svetlana Tihanovskaia 6,8% daýys jinaǵanyn málimdedi.
Jurttyń kóbi memlekettik ekzit-poll nátijesimen kelispeidi. Elde 9 tamyz keshkisin narazylyq kúsheidi.
Tihanovskaia 9 tamyzdaǵy baspasóz máslihatynda Minskidegi úsh sailaý ýchaskesinde jeńiske jetkenin málimdedi. Sheteldegi alternativ saýalnama nátijesi boiynsha, prezident sailaýynda Svetlana Tihanovskaia jeńiske jetken. Ekzit-poll uiymdastyrýshylardyń aqparatynsha, sheteldegi 19 sailaý ýchaskesindegi daýys sanaýdan keiin Tihanovskaia 79,69% daýys alǵan. 10,59% sailaýshy daýys berýdan bas tartqan. Lýkashenko 6,25% daýys ielengen.
9 tamyz keshke ulttyq ekzit-poll nátijesi jariialanǵan soń el narazylyqqa shyqty. Belarýs aqparat agenttikteri, Telegram kanaldar arnaiy jasaq kóshede adamdardy jappai ustaǵanyn habarlady. Narazylyq kezinde arnaiy jasaq (OMON) pen narazylardyń qaqtyǵysty.
TUT.by saitynyń taratqan videosynda arnaiy jasaq jurtty rezeńke coiylmen uryp jatqany kórinedi. Azattyqtyń Belarýs qyzmetiniń habarlaýynsha, arnaiy jasaq jinalǵandardy taratý úshin kózden jas aǵyzatyn gaz qoldanǵan.
Narazy jurt pen arnaiy jasaq. Minsk, 9 tamyz 2020 jyl.
Keibir aqparat agenttikteri narazylarǵa rezeńke oq atqanyn habarlady. Internette taraǵan videolarda atylǵan qarý daýysy estiledi. Zardap shekkender de bar. Narazylardyń kóbi "Ket! Ket!", "Masqara! Masqara!" dep aiǵailady.
Arnaiy jasaq narazylardyń birin uryp jatyr. Minsk, 9 tamyz 2020 jyl.
Táýelsiz sarapshylar bul sailaýda Lýkashenkonyń 50 paiyzdan az daýys jinaǵanyn, biliktiń sailaýdy ádil ótkizbegenin aitady.
Minskidegi, basqa elderdegi sailaý ýchaskelerinde uzyn sonar kezek paida bolyp, kóp adam daýys bere almady. 9 tamyz tús aýa Minsk qalasynda áskeri kólikter men politsiia, arnaiy jasaq kóbeidi. Sailaý aldynda, sailaý kúni arnaiy jasaq elde júzdegen adamdy ustady. Daýys berý kúni elde internet buǵattaldy.
Biylǵy sailaý eldi 26 jyl basqaryp otyrǵan Aleksandr Lýkashenko úshin qiynǵa soǵyp jatyr. Sailaý aldynda elde oǵan qarsy narazylyq kúsheidi. Jurttyń kóbi elde ózgeris bolǵanyn qalaidy.
Lýkashenkonyń negizgi qarsylasy retinde Svetlana Tihanovskaia kúieýi Sergei Tihanovskiidiń ornyna tústi. Tanymal videobloger Tihanovskii osy jyldyń mamyr aiynda prezidenttik sailaýǵa túsetinin málimdegen soń, qamaýǵa alynyp, sailaýǵa jiberilmegen.
Bilik oppozitsiialyq saiasatkerler Viktor Babariko men Valerii Tsepkalony kandidat retinde tirkemei qoidy. Babarikony ulymen birge qamap tastady, Tsepkalo Reseige ketti.
9 tamyzda Tsepkalonyń áieli Veronika Tsepkalo da Belarýsten Reseige ketkeni habarlandy.
Oppozitsiia atynan sailaýǵa túsip jatqan Svetlana Tihanovskaianyń sailaýaldy qoldaý aktsiialaryna myńdaǵan adam jinaldy. Máselen, Minskidegi Tihanovskaianyń mitingine, eriktiler esebinshe, 63 myńdai adam jinalǵan. Lýkashenko sailaý aldynda saiasi opponentterin "shetel agentteri" dep synaǵan.
EQYU jáne táýelsiz baqylaýshylar Belarýstegi sailaýlardy moiyndamaǵan.
