Ózbekstandaǵy parlament sailaýynyń ótý barysyn baqylaǵan Eýropadaǵy qaýipsizdik jáne yntymaqtastyq uiymy (EQYU) sailaý kezinde "táýelsiz pikirge degen tózimdiliktiń" artqany baiqalǵanmen "eleýli zańbuzýshylyqtar" saiasi naýqanǵa kóleńkesin túsirdi dep málimdedi.
Jeksenbi, 22 jeltoqsan kúngi sailaý - Shavkat Mirziiaev bilikke kelgeli beri ótken alǵashqy parlament sailaýy. Eldi uzaq jyl basqarǵan Islam Karimov 2016 jyly qaitys bolǵannan keiin onyń ornyna kelgen Mirziiaev elde reforma jasaýǵa ýáde bergen.
Sailaý protsesin baqylaǵan EQYU ilgerileýshilikpen qatar kemshilikter týraly da aitty.
"Zańnamanyń jaqsaryp, táýelsiz pikirge tózimdilik artqany anyq baiqaldy, biraq sailaý kúni protsedýralar naqty jáne tolyq oryndaldy dep aita almaimyz" dedi EQYU-nyń parlament assambleiasynyń tóraǵasy Georgii Tsereteli.
"Qarsylas partiialar ózderiniń saiasi platformalaryn tanystyryp, BAQ-ta debat ótti. Kóbi eń alǵash ret tikelei efirden kórsetildi. Biraq debat ótkizý erejeleri áli de bolsa shektelgen, al balama saiasi kúshterdiń úni anyq estilmedi" dedi Tsereteli 23 jeltoqsanda Tashkentte ótkizgen baspasóz jiynynda.
Tseretelidiń aitýynsha, EQYU baqylaýshylary daýys berý kezinde basqa bireý úshin daýys berý jáne daýys sanaýda protsedýralardy eskermeý siiaqty "kóptegen eleýli zańbuzýshylyqtar" týraly habarlaǵan.
