EQYU Demokratiialyq institýttar jáne adam quqyqtary jónindegi biýrosynyń (DIAQB) baiqaýshylar missiiasynyń delegattary Qazaqstan Respýblikasy Kásipodaqtar federatsiiasy baiqaýshylarynyń respýblikalyq shtabynda boldy, dep habarlaidy "Ult aqparat".
Delegatsiiany EQYU-nyń elektoraldy sholýshysy Mihaela Sivich basqardy.
Kásipodaqtar federatsiiasy atynan bul kezdesýge QRKF baiqaýshylarynyń Respýblikalyq shtabynyń tóraǵasy Nurlan Óteshev, Nur-Sultan boiynsha baiqaýshylardyń aimaqtyq shtabynyń tóraǵasy Tólegen Kúnádilov jáne QRKF baiqaýshylarynyń respýblikalyq shtabynyń analitik-sarapshysy Sherzod Pýlatov qatysty.
Mihaela Sivich kásipodaqtar federatsiiasynyń sailaýdy baiqaýǵa qatysýynyń maqsattary men mindetteri týraly surady.
«30 jyl buryn Kásipodaqtar Federatsiiasy óziniń qyzmetiniń basty maqsaty – kásipodaq músheleriniń áleýmettik-ekonomikalyq, eńbek quqyqtary men múddelerin bildirý men qorǵaýdy belgilep, memlekettik organdardan, jumys berýshilerden jáne saiasi partiialardan táýelsizdigin jariialady.
2 million múshesiniń múddelerin bildiretin Kásipodaqtar Federatsiiasy eń mańyzdy ishki saiasi protsesterden tys qala almaidy jáne sailaý protsesiniń zańdylyǵy men ashyqtyǵyn saqtaýdy qoldaidy. Qarasha aiynda biz baiqaýshy retinde Májilis pen Máslihattar depýtattarynyń sailaýyna qatysý týraly málimdeme jasadyq», – dep atap ótti Nurlan Óteshev.
Ol sheteldik áriptesterine kásipodaqtardan baiqaýshylardyń Respýblikalyq jáne aimaqtyq shtabynyń jumysy týraly, onyń ishinde baiqaýshylardy oqytý sharalary, BAQ-pen ózara is-qimyl jáne uiymdastyrý jumystary týraly habardar etti.
«Kásipodaqtar federatsiiasynyń baiqaýshylary retinde el boiynsha shamamen 7000 kásipodaq músheleri qatysady. Kásipodaq baiqaýshylary barlyq sailaý kezeńinde azamattardyń sóz bostandyǵyna quqyqtaryn qamtamasyz etýge baǵyttalǵan.Biz sailaý protsesiniń eldiń zańdaryna sáikes ótýin qamtamasyz etemiz. Eldegi shtabtardyń basshylary saiasi partiialarmen, jumys berýshilermen jáne eńbek ujymdarymen kezdesýler ótkizip, azamattardyń sóz bostandyǵyn buzýǵa jol berilmeitindigi týraly aqparatty jetkizdi», – dedi QKRF baiqaýshylar shtabynyń tóraǵasy.
Kezdesý aiasynda QRKF shtaby men monitoring júrgizetin basqa úkimettik emes uiymdardyń ózara is-qimyl máseleleri de talqylandy.
Baiqaýshylardy daiarlaý jónindegi jumys týraly aita otyryp, Nurlan Óteshev Sailaýdy partiialyq emes baiqaý ortalyǵy aiasynda baiqaýshylardy oqytý jónindegi Azamattyq Alianspen birlesken bastamalary týraly aitty. Ortalyq búkil el boiynsha sailaý ýchaskelerin barynsha qamtý úshin baiqaýshylardy eń jaqsy halyqaralyq standarttar sheńberinde oqytady. Ortalyqta QRKF men Azamattyq Alianstan shamamen 11 myń baiqaýshy oqytylatyn bolady. Halyqaralyq uiym ókilderi Qazaqstandaǵy EQYU keńsesiniń baiqaýshylar missiiasynyń jumysy týraly aitty.
Mihaela Sivich DIAQB baqylaýshylary parlamenttik sailaýdy EQYU mindettemelerine jáne basqa da halyqaralyq mindettemelerge, sondai-aq demokratiialyq sailaý standarttaryna sáikestigi úshin baǵalaitynyn basa aitty.
«Baiqaýshylar sailaýshylar men kandidattardy tirkeýdi, úgit-nasihat jumystaryn, sailaý ákimshiligi men tiisti memlekettik organdardyń jumysyn, sailaýǵa qatysty zańnamany jáne onyń qoldanylýyn, buqaralyq aqparat quraldaryn jáne sailaýǵa qatysty daýlardy sheshýdi muqiiat qadaǵalaidy», – dedi halyqaralyq sarapshy.
Kezdesý barysynda Kásipodaqtar Federatsiiasynyń sailaý protsesterine qatysýynyń mańyzdylyǵy atap ótildi.
Taraptar biraýyzdan ulttyq jáne halyqaralyq zańnamanyń talaptaryna sáikes Qazaqstanda ashyq jáne ádil sailaý ótkizýdiń mańyzdylyǵyn atap ótti.
