IH Azamattyq forýmda QR saýda jáne integratsiia ministri Baqyt Sultanov otandyq eksport sýbektilerine qandai qoldaý kórsetiletinin aityp berdi, dep habarlaidy QazAqparat.
Onyń aitýynsha, ministrlik qysqa merzimde ázirlegen Saýdany damytý týraly memlekettik baǵdarlama qoǵamda qyzý pikirtalas týdyrdy, qazir ol Prezident tapsyrmasyna sáikes tolyqtyrylyp jatyr.
«Bizdiń sheshimderimizdiń tiimdiligi olardy qabyldaýda qoǵam, biznes jáne memleket múddeleri balansynyń qanshalyqty saqtalatynyna bailanysty. Álemdik jahandaný úrdisi ózgerip jatqan qazirgi ýaqytta bizdiń birinshi mindetimiz – eksporttaýshylardyń problemalaryna jedel mán berý. Bizdiń «QazTrade» kompaniiamyzdyń alańy bir jylda ózindik «Dostar klýbyna» ainaldy, onda eksporttaýshylar men biznes-qaýymdastyqtar halyqaralyq saýdadaǵy problemalar men kedergilerdi talqylai alady. Bizdiń Telegramdaǵy Export.gov arnamyz belsendi jumys isteidi. Kásipkerlermen tyǵyz qarym-qatynas ornatyp, eksporttaýshylardyń shyǵyndaryn óteý erejelerin ózgerttik. Qujattar paketi ońtailanyp, taýarlar tizimi ózektendirildi jáne óteletin shyǵyndardyń jańa túrleri engizildi. Memlekettik qoldaýdyń bul quraly bizneske óndiris kólemin ulǵaitýǵa, taýarlar jelisi men eksport geografiiasyn keńeitýge múmkindik beredi», - dedi ministr IH Azamattyq forýmda úkimettik emes uiymdarmen kezdesý barysynda.
Mysaly shyǵyndardy óteý quraly BAÁ-ge akkýmýliatorlardy, Belgiiaǵa zyǵyr men rapsty, Italiiaǵa jasymyqtardy jetkizýge kómektesti, metallýrgiialyq ónimder Japoniiaǵa jetkizildi. 205 eksporttaýshyǵa memlekettik qoldaý kórsetildi.
«Eksporttaýshylar jeńildetilgen nesieler men eksporttyq saqtandyrý alady. 2020 jyly KazakhExport 70-ten astam eksporttaýshynyń 63 mlrd teńgege jýyq kelisimsharttaryn saqtandyrdy. Jyl sońyna deiin bul deńgei 100 mlrd teńgege jetedi dep kútilýde. Bul saqtandyrýdy paidalanatyn eksporttaýshylar túrli salalarda jumys isteidi: tamaq, himiia, jeńil ónerkásip, mashina jasaý, metallýrgiia, qurylys materialdaryn óndirýmen ainalysady. Mysaly, biylǵy shilde aiynda jambyldyq óndirýshi avanstyq tólemdi saqtandyrý quralyn alǵash ret paidalanyp, Shensi provintsiiasyna maqsary maiyn jetkize aldy», - dep túsindirdi Baqyt Sultanov.
