Búgin «Astana EKSPO-2017» Ulttyq kompaniiasy men QR Energetika ministrligi birigip ótkizgen balamaly energetika salasyndaǵy eń úzdik joba baiqaýy óz máresine jetti. Nátijesinde almatylyq ǵalym Marat Isekeevtiń jobasy eń úzdik dep tanyldy, dep habarlaidy Baq.kz tilshisi.
5 aidyń ishinde konkýrsqa 100-den astam ótinish kelip túsken. Arnaiy qurylǵan komissiia músheleri 50 jobany iriktep aldy. Keiin ǵalymdar men ónertapqyshtar arasynda ótkizilgen konkýrsta jeńimpaz daýys berý arqyly anyqtaldy. Nátijesinde kompiýterlik tehnologiia jáne logistika kafedrasynyń professory, QazATiSO «G-Global» jastar shtabynyń jetekshisi, t.ǵ.k. Marat Isekeev jeńiske jetti. Jeńimpazdy «Astana EKSPO-2017» UQ» AQ Basqarma tóraǵasynyń orynbasary Erbol Shormanov quttyqtady.
«Bizdiń bolashaǵamyz úshin innovatsiialyq jobalar óte mańyzdy. Atalmysh konkýrsqa elimizdiń barlyq óńiriniń ǵalymdary men ónertapqyshtary qatysty. Olar otandyq innovatsiia salasyn damytýǵa óz úlesterin qosýda. Qazaqstan 2017 jyly halyqaralyq deńgeide innovatsiia alańyna ainalady. Biz «EKSPO-2017» halyqaralyq kórmesi» arqyly álemge óz ǵalymdarymyzdyń osy salada jetken jetistikterin kórsete alamyz. Búgingi konkýrsta Marat Isekeevtiń jobasy jeńiske jetti», - dedi tóraǵa orynbasary.
Al konkýrs jeńimpazy Marat Isekeev ózi jasaǵan jel stantsiiasynyń maqsatyn túsindirdi.
«Bizdiń negizgi maqsatymyz – aýyl-aimaqty energiia kózimen qamtamasyz etý. Qazaq dalasynda balamaly energiia kózderin tiimdi paidalanýǵa bolady. Ásirese, jel energiiasyn. Jobany jasaýǵa kóptegen stýdent qatysty. Jel stantsiiasyn qurastyrýǵa úsh jyl ýaqyt ketti. Sondai-aq, 5 mln teńge kóleminde qarjy jumsaldy», - dedi ǵalym.
Sonymen qatar, ónertapqysh ózi qurastyrǵan jel stantsiiasy arqyly Jońǵar qaqpasyn tiimdi paidalanýǵa bolatyndyǵyn atap ótti.
«Men bar ǵumyrymdy Jońǵar qaqpasyn tiimdi paidalanýǵa arnadym. Onda 30 metr biiktikte 58 m/s jyldamdyqpen jel soǵady. Ol Qytaimen shekaralas aimaqta ornalasqan. Al Qytai bizden jylyna 40-45 mlrd kilovatt/saǵat elektr energiiasyn jiberýdi surap otyr. Iaǵni tek munaiǵa úmit artpai, jel energiiasynan jylyna 40-50 mlrd qarjy kóleminde paida tabýǵa múmkindik bar», -deidi ǵalym.
Aita keteiik, jeńiske jetken úzdik innovatsiialyq joba EKSPO-2017 kórmesindegi Qazaqstan pavilonyna qoiylady.
