Eljan Birtanov Memleket basshysynan Densaýlyq saqtaý ministri laýazymynan bosatýdy ótingenin málim etti, dep habarlaidy "Ult aqparat".
«Qurmetti áriptester men dostar! Búgin men Memleket basshysynan densaýlyq saqtaý ministri laýazymynan bosatýdy suradym. Ókinishke qarai, koronavirýs infektsiiasyn juqtyryp alǵannan keiin aýrý kúrdeli pnevmoniiaǵa ulasyp, qosymsha em-dom qabyldaý qajettigi týdy», - dep jazdy eks-ministr Facebook paraqshasynda.
Onyń jazýynsha, qazirgi tańda eldegi epidemiologiialyq ahýaldyń kúrdelenýine bailanysty salany tolyqqandy basshy basqarýy kerek.
«Ministrlik deńgeiinde de, aimaqtar deńgeiinde de solai esepteimin. Bizdiń densaýlyq saqtaý júiesi túsken júktemeni eńseretinine senimdimin. Oǵan ýaqyt jáne árbirimizdiń kúsh-jigerimiz kerek. Óz áriptesterimniń bárine densaýlyq pen tabandylyq tileimin», - deidi Eljan Birtanov.
Jazba sońynda Eljan Birtanov Qazaqstannyń densaýlyq saqtaý salasyn damytýǵa úles qosýǵa múmkindik berip, senim bildirgen Memleket basshysyna alǵysyn aitty.
Eske sala ketsek, búgin Memleket basshysynyń Jarlyǵymen Eljan Birtanov Qazaqstan Respýblikasynyń Densaýlyq saqtaý ministri qyzmetinen bosatylyp, onyń ornyna búgin Aleksei Tsoi taǵaiyndaldy.
QR Premer-Ministri Asqar Mamin Memleket basshysynyń Jarlyǵymen taǵaiyndalǵan ministr Aleksei Tsoidy Densaýlyq saqtaý ministrliginiń ujymyna tanystyrdy.
Al Eljan Birtanovtyń koronavirýs juqtyryp, aýrýhanaǵa túskeni týraly aqparat 14 maýsymda taraǵan bolatyn.
