«Nur Otan» partiiasynyń Tóraǵasy Nursultan Nazarbaevtyń sheshimimen Tamara Dúisenova partiia hatshysy qyzmetine taǵaiyndaldy, dep habarlaidy "Ult Aqparat" partiianyń baspasóz qyzmetine silteme jasap.
Búgin «Nur Otan» partiiasy Tóraǵasynyń Birinshi orynbasary Máýlen Áshimbaev Ortalyq apparat ujymyna partiianyń jańa hatshysyn tanystyrdy. Máýlen Áshimbaev Tamara Dúisenovanyń memlekettik qyzmette jáne basshylyq laýazymda tájiribesi bai ekenin erekshe atap ótti. Sondai-aq, ol Elbasynyń partiia qyzmetin jańǵyrtý jónindegi tapsyrmasyn júzege asyrýǵa jańa hatshynyń úlken úles qosatynyna senim bildirdi.
«Sizdiń áleýmettik saladaǵy bai tájiribeńiz partiia jumysyna igi áserin tigizedi dep esepteimin. Sebebi, áleýmettik máselelerdi sheshý «Nur Otan» partiiasynyń basym baǵyttarynyń biri bolyp sanalady. Sizdiń partiia qataryna kelýińizben osy baǵyttaǵy jumysymyzdy odan ári kúsheitemiz dep senemin», - dedi Máýlen Áshimbaev.
Tamara Qasymqyzy Dúisenova 1965 jyly 11 qańtarda Ońtústik Qazaqstan oblysynda týǵan. Tashkent halyq sharýashylyǵy institýtyn bitirgen. Ekonomika ǵylymdarynyń kandidaty.
Ár jyldary ol jaýapty basshylyq qyzmetterdi abyroimen atqardy. Atap aitqanda, Shymkent qalasy ákiminiń birinshi orynbasary, Ońtústik Qazaqstan oblysy ákiminiń orynbasary, Eńbek jáne áleýmettik qorǵaý ministrliginiń jaýapty hatshysy, vitse-ministri, Densaýlyq saqtaý jáne halyqty áleýmettik qorǵaý ministri, Eńbek jáne halyqty áleýmettik qorǵaý ministri bolyp jumys istedi.
