Jemqorlyq kúdigine ilingen burynǵy densaýlyq saqtaý ministri Eljan Birtanovtyń advokaty eks-ministrdiń densaýlyǵynyń nasharlaǵanyn habarlady. Bul aqparatty jergilikti "Astana" telearnasy taratty, dep
Advokat Dmitrii Kýriachenko telearnaǵa bergen suhbatynda "tergeý organdarynyń áreketi isti obektivti júrgizýge emes, Birtanovty qýdalaýǵa baǵyttalyp otyr" dep málimdegen.
"Kerisinshe, onyń kinásizdigin jáne qatysy joǵyn dáleldeitin faktiler bar. Aiyp densaýlyq saqtaý salasyndaǵy integratsiialyq platforma jasaýshy horvattyń "Erikson Nikola Tesla" kompaniiasynyń óz mindetterin oryndamaǵany jaily kúdikke negizdelgen. Alaida tipti meditsina mekemesindegi hattar daýy platformanyń jumys istep turǵanyn dáleldeidi" dedi advokat.
26 naýryzda sot úiqamaqta otyrǵan Eljan Birtanovtyń qamaý merzimin uzartqan.
Byltyr qarashada Birtanovtyń "iri kólemde qarjy jymqyrý" kúdigi boiynsha ustalǵany belgili bolǵan. Sol kezde birqatar jergilikti BAQ eks-ministrdiń tsifrlandyrýǵa bólingen 526 million teńge kóleminde (1,2 million dollar) qarajatty "iemdendi" dep aiyptalǵanyn jazdy.
Birtanov ustalǵannan keiin áleýmettik jelide ony qoldaý aktsiialary ótti. Qoldanýshylar bilikten ony bosatýdy suraǵan.
Buǵan deiin advokaty prezident Qasym-Jomart Toqaevqa úndeý joldap, eks-ministrdiń "zańsyz qýdalanýyn" baqylaýyna alýdy ótingen.
50 jastaǵy Eljan Birtanov 2017 jyldyń qańtarynan 2020 jyldyń maýsymnyń sońyna deiin densaýlyq saqtaý ministri qyzmetin atqarǵan. Ol koronavirýspen aýyrǵandar sany kúrt kóbeiip, aýrýhanalarda oryn jetpei qalǵan tusta otstavkaǵa ketken. Onyń ornyna Aleksei Tsoi qyzmetke keldi.
