Foto: Facebook/Kýandyk Bishimbaev
Qazaqstandyq BAQ-ta jáne áleýmettik jelide burynǵy ekonomika ministri Qýandyq Bishimbaev óziniń áielin uryp óltirdi degen kúdikpen ustalǵany týraly aqparat tarap jatyr.
Derekkózderde buryn jemqorlyq úshin sottalǵan Bishimbaev elordadaǵy meiramhanalardyń birinde (Bau - QazAqparat) áielin mas kúiinde urǵany týraly jazylǵan. Áiel jedel járdem kóligi jetkenshe qaitys bolǵan.
Astana qalasynyń Politsiia Departamenti meiramhanada janjal bolyp, saldarynan bir áieldiń kóz jumǵanyn rastady. Alaida osy oqiǵaǵa qatysty ne kúdiktiniń, ne kóz jumǵan adamnyń aty-jónin atamady.
"Astana qalasy PD Jedel basqarý ortalyǵyna qaladaǵy meiramhanalardyń birinde kelýshiler arasynda janjal bolyp, saldarynan áieldiń dene jaraqatynan qaitys bolǵany týraly habarlama kelip tústi.
Kúdikti ustaldy. Tiisti saraptamalar taǵaiyndaldy.
Oqiǵa ornynda PD men Esil aýdandyq PB jedel-tergeý toptary jumys istep jatyr. Tergeý amaldary júrgizilýde" - delingen habarlamada.
QR Qylmystyq-protsestik kodeksiniń 201-babyna sáikes («Sotqa deiingi tergep-tekserý derekterin jariia etýge jol bermeý»), bul qylmystyq is boiynsha ózge málimetter jariia etýge jatpaidy.
Eske salaiyq, burynǵy ulttyq ekonomika ministri Qýandyq Bishimbaev 2017 jyldyń qańtarynda jemqorlyq qylmysy úshin ustaldy.
2018 jyly naýryz aiynda eks-ministr 10 jylǵa bas bostandyǵynan aiyryldy.
Tergeý materialdaryna sáikes, Bishimbaev Qyzylorda qalasyndaǵy shyny zaýytynyń qurylysyna jaýapty bolǵan. Sol kezde onyń inisi Sultan Nurlybek 2 million dollar kólemindegi para alýǵa deldaldyq jasaǵan.
Sottyń sheshimi boiynsha Bishimbaev memlekettik qyzmette basshylyq qyzmet atqara almaidy. Ótken jyly mamyr aiynda appeliatsiialyq sot onyń úkimin ózgerissiz qaldyrǵan bolatyn. Keiin ony Shymkent qalasyndaǵy koloniiaǵa aýystyrdy.
Eks-ministr ustalǵan sátten bastap 2 jyl jáne 9 aiyn temir tordyń ar jaǵynda ótkizdi.
