Eks-depýtat, belgili YouTube-bloger Táńirbergen Berdońǵar jańa videosynda BTA Bankiniń eks-basshysy Muhtar Ábliazovtiń burynǵy rezidentsiiasyn kórsetti, dep jazady Tengrinews.kz
Video nysannyń ishinde túsirilgen, al syrty dronnan túsirilipti. Záýlim keshen Almatynyń joǵarǵy jaǵynda, Býtakovka mańynda ornalasqan. Biik qorshaý qoiylǵan úsh gektar jerde jeke úi, qonaqtarǵa arnalǵan úi, sharýa qurylystary bar.
Záýlim baspana mármármen jáne ózge de baǵaly materialdarmen kómkerilgen.
"Sóitsek, bul ákim Hrapýnovtyń rezidentsiiasy bolypty. Keiin memlekettik múlikti ol áieliniń atyna jazdyryp alypty. Ábliazov pen Hrapýnov týys bolǵandyqtan - ol oǵan arzanǵa satyp jibergen", - deidi Berdońǵar.
Sondai-aq, eks-depýtat Sybailas jemqorlyqqa qarsy is-qimyl ulttyq biýrosynyń ǵimaratynda bolǵan. Munda ol Ábliazovtiń qylmystyq isi boiynsha úsh myń tom materialdy kóredi.
2017 jyldyń maýsymynda Almaty soty Muhtar Ábliazovti qylmystyq uiym quryp, BTA Bankiniń qarajatyn urlady dep taýyp, 20 jylǵa bas bostandyǵynan aiyrǵan edi. Ábliazovtiń ózi kóp jyldan beri shetelde júr. Sybailas jemqorlyqqa qarsy is-qimyl ulttyq-biýrosynyń málimetinshe, eks-bankir memleketke 7,5 milliard dollar shyǵyn keltirgen.
