Qazaqstannyń eńbek sińirgen ártisi Gúlnár Siqymbaeva 63 jasynda qaitys boldy. Óner iesi kópshilikke "Men saǵan ókpelemeimin" ánimen tanyldy. Keiingi bergen suhbattarynda ónerge ókpelemeitinin, alaida kontsertterge shaqyrylmai qalǵanyna nalyp júrgenin jii aitqan eken...
Balalyq shaǵy týraly
Anam Syndar 39 jasynda qaitys boldy. Keńsharda saýynshy bolyp jumys istegen aiaýly anamnyń án salǵanyn bir-aq márte estippin. Sol daýys máńgilikke qulaǵymda qalyp qoidy. Bálkim, anama degen ystyq saǵynyshym, ishtegi muńym, sherim bolar, anamdy oilasam, sol án salǵan sáti kóz aldyma keledi. Jaǵymdy úni qulaǵyma estiledi. Ánshilik joldy tańdaýyma osy jait ta kóp áser etti ǵoi deimin.
Ekrannan nege kórinbei ketkeni týraly
Sońǵy on jyldan beri Qazaq Memlekettik qyzdar pedagogikalyq ýniversitetinde sabaq berip júrmin. Aǵa oqytýshy degen dárejem bar. Vokaldan sabaq beremin. Qazir ánshi bolý bizdiń kezimizdegidei qiyn emes. Ekrannan kórinbei, eldiń nazarynan tys qalyp jatqanyma júregim aýyrady. Bir-eki márte izdenip kórdim. "Keiinirek habarlasyńyz" degen syńaidaǵy jaýaptardan keiin júregim shailyǵyp qaldy.
"Adamnyń ózi qartaisa da, kóńili qartaimaidy" degen sózdiń nege aitylǵanyn endi túsinip júrmin. Alaida ózimdi sahnadan ketetin jasqa jettim dep oilamaimyn, kerisinshe, naǵyz ónerimdi pash eter shaǵym týdy dep esepteimin. Ónerge eshqandai ókpem joq. Ónerimniń arqasynda óndim-óstim, elge tanyldym, abyroi jinadym. Áitse de, áli de bolsa maǵan bul baǵyttaǵy jumystardy jandandyryp, tynym tappaý kerek siiaqty.
Úide qarap otyrmaimyn. El ishine gastroldik saparǵa shyǵyp, jeke kontsertterimdi ótkizemin. Biraz jyl buryn Qytaidyń kei qalalaryn aralap shyqtym. Arasynda toi-tomalaqqa baryp turamyn. Halqymyz aman bolsa, jaǵdaiymyz jaman bolmas.
Jeke ómiri týraly
Jubaiym basqa ulttan (slavian halqynan). Ákem basqa ult ókiline turmysqa shyqqanyma qatty qarsy boldy. 5 jyl boiy bir-birimizdi kórmedik. Ol kisi múldem habarlaspady. Jalǵyz enem boldy. Maǵan kartop tazalatyp, tamaq istetpeitin. Kúieýim de ózime óte jaily boldy.
Baiyr degen bir ulym bar, ol - musylman. Joldasym balaǵa óz tegińdi ber dedi (sosyn Baiyr Siqymbaev bolyp jazyldy). Biraq balamdy súndetke otyrǵyzǵanda kúieýim qatty renjigen edi ("Jaratýshy bir. Balany nege qinadyń?" dep). Sol ulymnan nemere súiip otyrmyn.
Densaýlyǵy týraly
Biz sahnaǵa ádemi kiinip, jainap shyqqanymyzben medaldyń arǵy beti bar. Densaýlyqqa ziiandy jaǵy tolyp jatyr. Júike men júrekke az salmaq túspeidi. Ýaiym, kúizelis, shyǵarmashylyq toqyraý, basqa da jáitter júregińdi aýyrtpai qoimaidy.
"Kúnine toqsan pále kórseń-daǵy, kúder úzbe jaratqan bir Alladan" degen ǵoi. Qanǵa bitken qasiet pe, bálkim, namysqoilyq shyǵar, qinalǵanymdy tiri janǵa sezdirgim kelmeidi.
