9 naýryz kúni Youtube áleýmettik jelisinde «Qorǵaý HR» Adam quqyqtaryn qorǵaý» qorynyń ókili Gúlmira Isembievanyń beineúndeýi jariialandy. Osyǵan bailanysty Parlament Senaty jaýap berdi, dep habarlaidy "Ult aqparat" Senattyń baspasóz qyzmetine silteme jasap.
Gúlmira Isembievanyń úndeýinde bylai delingen:
«QR Parlamenti Senatynda ótetin árbir dóńgelek ústel barysynda ata-ana retinde sóz sóileimin deýshilerge sóz sóileý múmkindigi berilmeidi, mikrofondar óshiriledi. Bizge sóz sóileýge ruqsat berilmeidi. Meniń aitqym kelgeni, qazirgi ýaqytta meditsinanyń aralasýynan, kez kelgen meditsinalyq aralasýdan bas tartqan ata-analardy, bizderdi ata-ana quqyǵynan aiyratyn 152-shi bap Parlamentte qaralyp jatyr, olardyń pikirinshe, bul shara balalardyń densaýlyǵyn saqtaidy. Iaǵni, biz ekpe saldyrǵymyz kelmese, onda bizdi ata-ana quqyǵynan aiyra alady. Biz balamyzdy psihotroptyq dári-dármekpen emdegimiz kelmegen jaǵdaida (al qazirgi ýaqytta mektepterde pisohodiagnostika engizile bastady) bizdi taǵy da ata-ana quqyǵynan aiyrýy jáne balamyzdy balalar úiine jiberýi múmkin. Men bul túzetýmen kelispeimin jáne meniń oiymsha kóp ata-analar da bul túzetýmen kelise qoimas».
Senattyń baspasóz qyzmeti bul derekter shyndyqqa janaspaitynyn resmi túrde habarlaidy. Qazirgi ýaqytta Senatta beineúndeýde aitylǵan máseleler talqylanyp jatqan joq. Tipti, bul máseleler qarastyrylǵan zań jobasy da qaralyp jatqan joq.
Senatqa kelip túsken barlyq zań jobalaryn talqylaýǵa jurtshylyq keńinen qatysady. Árkim sóz alyp, óz pikirin bildire alady.
Jurtshylyqpen tyǵyz qarym-qatynasty qamtamasyz etý maqsatynda Parlamenttiń resmi saity (senate.parlam.kz) jumys istep keledi. Onda «Keri bailanys», «Usynystardy jinaý», «Zań jobasyn usyný», «Qaralyp otyrǵan zań jobalary» siiaqty aidarlar bar.
