Oljas Qudaibergenov Ulttyq ekonomika ministrligi janyndaǵy Basqarýshy keńestiń tóraǵasy bolyp sailandy, dep habarlaidy "Ult aqparat" ministrlikke silteme jasap.
QR Ulttyq ekonomika ministrligi janyndaǵy Basqarýshy keńestiń otyrysynda Qazaqstan Respýblikasyndaǵy memlekettik basqarýdyń jaǵdaiy men bolashaǵy talqylandy.
Ulttyq ekonomika ministri Rýslan Dálenov Keńestiń negizgi mindetterin túsindirdi. Bul Ministrliktiń qyzmetin baǵalaý jáne jetildirý boiynsha usynymdyq sheshimder ázirleý.
Keńes tóraǵasy bolyp ekonomist, Qazaqstan Respýblikasy Prezidentiniń janyndaǵy áleýmettik-ekonomikalyq reformalardyń monitoringin taldaý ortalyǵynyń múshesi Oljas Qudaibergenov sailandy.
Kún tártibi boiynsha Ulttyq ekonomika vitse-ministri Aigúl Shaiymova sóz sóiledi. Onyń aitýynsha, sapa men tiimdilikti arttyrý úshin memlekettik apparatty basqarýdyń quzyrettilik tásiline kóshirý josparlanýda. Bul uiymdyq qurylymǵa ikemdilik beredi jáne memlekettiń ekonomikalyq kún tártibiniń trendterin eskere otyryp, memlekettik organdar qurylymynda «jumsaq» departamentter qurýǵa múmkindik beredi.
Otyrysqa qatysýshylar qoiylǵan mindetterdi nátijeli sheshý úshin memlekettik organdardyń kadrlyq áleýetin odan ári jetildirý boiynsha usynystar jasady.
Ulttyq ekonomikalyq vedomstvo basshysy Rýslan Dálenov usynylǵan sharalardy iske asyrý tetigi jańa ekonomikalyq saiasattyń negizgi baǵyttary boiynsha nátijege qol jetkizýge baǵyttalatynyn atap ótti. Quzyrettilik tásil qabyldanǵan sheshimderdiń tiimdiligin arttyrady. Óitkeni basqarýshylyq sheshimder qabyldaýdyń tek bir ǵana deńgeii bolady.
